Dêrsim de rixmê qedexeyê çalakîyan û aktîvîteyan vizêr reyna çalakîya vera qeyûmî ameye viraştene. Kîtleyo ke Meydanê Seyîd Rizayî de ame têhet ard ziwan ke heta peyser girewtişê şaredarîyan ê çalakîye de yê.
Dêrsim de Partîya Şaran a Demokratîke (HDP) rixmê qedexeyê çalakîyan û aktîvîteyan ê semedê mengêke çalakîya roniştişî viraşte.
Çalakîya ke Meydanê Seyîd Rizayî de ameye viraştene temsîlkarê partîyanê sîyasîyan û tezgehan, rêxitinê HDP’yî yê qezayan, parlamenterê HDP’yî yê Stenbolî Alî Kenanoglû û xeylî hemwelatijî tewrê ci bîyî.
Na Herre Rixmê Heme Hêrişan Çi Rey Milê Xo Çewt Nêkerd Do Nêkero
Alî Kenanoglûyo ke çalakîye de qisey kerd qeyûmî sey derbeyêka sîyasîye name kerdî û va: ‘‘Vera xespkerdişê îradeyî çalakîyî heqê şarî yê meşru yê. Na herre zaf zulm, gonî û hesirî dîyî la çi rey milê xo çewt nêkerd. Çi rey îradeyê xo teslîm nêkerd û ewro ra tepîya zî do nêkero.‘‘ Kenanoglûyî cezaya sereka CHP‘yî yê Stenbolî Canan Kaftancioglu zî vist vîr û va: ‘‘Dadgero ke ceza daye Selahattîn Demîrtaşî eynî dadgerî ceza daya Kaftancioglu zî. No dadger bitaybetî ewnîyeno dawayanê krîtîkan ro. Eşkeraya ke no qererêko sîyasî yo.‘‘
