Platformê Kede û Demokrasîyî yê Dêrsimî bi wesîleya serrgêra 83ine ya Terteleyê Dêrsimî Çimeyanê Halvorî ke bi hezaran merdimî kişîyayî û erzîyayî awe de qurbanê terteleyî yad kerdî.

Sîyasetmedarî temsîlkarê partîyanê sîyasîyan û dezgehan zî tede xeylêk kesî tewrê aktîvîteye bîyî. Badê rezgirewtişî eşkerayîye ameye dayene û ame waştene ke wa arşîvî bêrê akerdene, hesab bêro dayene, şarê Dêrsimî ra êfu bêro waştene, û nameyê Dêrsim reyna peyser bêro dayene, lîsteyê vînîbîyayeyan û cayê goranê Seyîd Rizayî û embazanê ci bêro eşkerakerdene, wa astengîyê verê ziwan, nasname û bawarî yê dêrimijan bêro wedartene û planê talankerdişê xoza bêrê îptalkerdene.

Parlamêterê HDPyî Alîcan Onlu yo ke bi kirmanckî qisey kerd vat: ''Cayo ke ma tede yê manaya ci esta. Nê koyî cayê tewr bianorî yê têkoşînî yê, bitaybetî zî yê têkoşînê cinîyan ê. Cinîyan semedê pawitişê anorê xo xo nê zinaran eşt war. Nê zinarî, zinarê anor û xoverdayîşî yê. Nê zinarê Sakîneyanê ke koyan de têkoşîn kenê. Vatêne ma kîlîtê nê koyan vîn kerdo. Êyê ke çewres serrî yo gêrênê kîlîtê nê koyan bi têkoşînî kîlît dî. No kîlît nasname, bawerî, îtîqat û anorê na herre yo.''

Dima ra loqmayî ameyî vilakerdene û çirayî ameyî tafînayene. Semedê qurbananê terteleyî vilîkî erzîyayî awa Munzurî. Hunermend Metîn Kahramanî deyîrê kirmanckî vatî. Bado zî Meydanê Seyîd Rizayî de çirayî ameyî tafînayene.