Rêxistina HDPyî ya Dêrsimî çarçewa  Kampanyaya 'Semedê Her Kesî Edalet' de Mazgêrd de cayo ke tede meyîtê 20 pezkovîyan dîyayî eşkerayîyêka çapemenîye kerde. Eşkerayîye ra verî heyetê HDPyî de esnafê dewa Seyîdan, qezaya Pêrî û merkezê Mazgêrdî û Ocaxê Mansur Babayî yê dewa Muxundî zîyaret kerdî.

Heyetê HDPyî de Wekîlê Dêrsimî alîcan Onlu, Wekîlê Antalya Kemal Bulbul, Hemşaredaranê Pêrî Orhan Çelebî û Songul Dogan ê ke herinda înan de qeyûm ame tayînkerdene, îdarekaranê rêxistine ca girewt. 

Alîcan Onluyî eşkerayîye de qisey kerd û vat: ''Ziwan, kultur, bawerî, ko, kerra û gandarê na cografya raştê bêedaletîye yenê. Koyê Hardê Dewreşî, jîrageyî hewceyê edaletî yê. Hema fam nêbo ke çira nê pezkovîyî merdê. Pezkovîyî binê tehlukeyê qirkerdişî de yê. Na cografya de bi serran o gazê kîmyewî şuxilîyenê, koyî dîyenê bombayan ver. Xora rewşa winasêne de mergî qewimîyenê. Ê maran anê tîya de verdenê, xoza rê mudaxele kenê.''

Kemal Bulbulî zî vat: ''Pezkovîyî ma rê fîraz ê. Coka seydîya înan qirkerdiş a. Derheqê mergê 20 pezkovîyan de agahîyêke nêdîyaye. Ganî derheqê na mesele de eşkerayîyêke bêra dayene. Ganî fîrazanê merdiman rê hûrmet bêro mojnayene. ''

Ocaxê Baba Munsurî de heyetî findeyî tavistî, duayî kerdî. 

Zîyaretê esnafan de zî ame parekerdene ke krîz tesîrê pîlî keno. Cendirmeyan zîyaretê Pêrî de wesayîtê HDPyî bi bahaneya vîrusî vindarnayî. Wextê nîqaşî de wesayîtê bînî dekewtî Pêrî. Heyetî vera rewşe nêrazîbîyayîşê xo mojna.