Rêxistina HDPyî ya Dêrsimî derheqê Kampanyaya 'Herkesî rê Edalet' de kombîyayîşê çapemenîye kerd. Hetkarê Hemserekanê HDPyî û Wekîlê Dêrsimî Alîcan Onlu û Wekîlê Antalya Kemal Bulbul kombîyayîş de qisey kerd.

Onluyî bale ante nîqaşê qefilnayîşê HDPyî ser û vat: ''Vera partîya ma, muxalîfan û çapemenîye tedayê pîlî estê. Îqtîdarî pandemî zî seba xo kerd rant. Ma nê prosesî de pê kampanyaya 'Keyeyê Wayûbirayî' paştî daye şarî. Ma vera şerî vanê haştî vera tecrîdî zî vanê azadîye. Heta ke blokê AKP-MHP-Ergenekonî şoro ma de bi hawayêkê bêmabênî têkoşîn bikerê.''

Onluyî da zanayene ke ê sey HDPyî dest pê prosesê înşa kerd û vat: ''Ma hedef kenê ke Kurdîstan de destkewteyanê xo reyna bivisnê destî, Tirkîya de zî AKP-MHP bin bikerê. Ma çarçewa Kampanyaya 'Her kesî rê Edalet' de biranê Mehkemeya Heqanê Merdiman a Ewropa (MHME), xizanîye, edalet xo rê bikerê rojdem. Nînan het de ma hê dekewenê prosesêkê çalakîye. Ma do bernameyê çalakîyan virazê û pîya nê prosesî birêxistin bikerê.''

Bulbulî zî eşkera kerd ke çarçewa dewaya Kobanê, bira MHME û grevê vêşanîye yê tepişteyan de ê do çalakîyan bikerê û vat: ''AKP vera kurdan sûcan keno. Suleyman Soylu vera kurd, elewî, cinîyan sûcan keno. Ma do bikerê ke nê kesî verê edaletî de hesab bidê. Gulîstane Doku serrêk a nêdîyaye. Dewleta ke bi saetan Dêrsim teqîb kena na cinîye nêvînena. A raşte şexsê Gulîstane Doku, Velî Yildizî de vera Dêrsim, kurdan, elewîyan polîtîkaya înkarî bi hawayêkê sîstematîkî yena caardene.  Ma do têkoşînê xo yê demokratîkî dewam bikerê.''