Dêrsim de serra peyêne de  xeberê tacîz, tecawuz, qirkerdişê  cinîyan û îstîsmarê domanan rojdemî ra nêkewt. Îstîsmar û qewimîyayîşê vînkerdişî yê bajarî sey leteyê şerê taybetî yê dewlete yenê ercnayene.

Gulîstane  Dokuya ke 5ê çeleyî ra vînîbîyayîye ya hema zî tira xeberêke nêameye girewtene û hetê bînî ra îstîsmarê vera domanan ê Pêrtagî zî heme aktule o. Tewr peynî de zî Taxa Ataturkî de cinîya bi nameyê H.K. ke cayê karî de raştê tacîzê Huseyîn Polatî ameye. Wekîlê Partîya Demokratîke ya Şaran (HDP) yê Dêrsimî Alîcan onluyî qewimîyayîşê bajarî erjnayî.

Onluyî vist vîrî ke cipêrsayîşê derheqê Gulîstane Doku de hetê walîyê verênî yê Dêrsimî Tuncer Sonelî ra têna xokiştişî ser o ame rayraberdene û vat: ''Na babete de Zeynal  û  babîyê ci polîs têna nîyê. Eceba Gulîstane polîtîkayanê bêehleqîye û asîmîlasyonî rê bîye şehîde? Ya  ya zî ame waştene ke a zî bibe aletê ci?

Xora xebitnayîşê Taxa Ataturkî  ke tede tacîz ame kerdene hetê hetkarê  Tuncel Sonelî Samî Doganî ra yeno pawitene. xepskerdişê şaredarîye qîm nêkerd pîya cayê karî akerdî. Xebitnayîşanê Taxa Ataturkî de  tacîz û tecawuzî ameyî ciwîyayene. Cinîyan derheqê nê qewimîyayîşan de xebatî dayî desptêkerdene. Ma zî do mîyanê xebatan de bê û meclîs de bidê eşnawitene.  Bajar de binê nameyê esnayî de hetê walî û hetkarê ci ra mekanê ke tede fuhuş beno û ercê ehleqî yenê binpaykerdene ameyî akerdene. Bi destê tarîkatkeranê AKPyî û çawişanê pîsporan bêeheleqîye yena kerdene.''

Onluyî bale ante ser ke tim vera şar, ziwan, îtîqat, kultur û xozaya Dêrsimî polîtîkaya dişmenîye yena rayraberdene û vat: ''Pêrtag de hîrê serrî domanan rê tecawuz ame kerdene ke mîyanê înan de qoricî,çawişê pîsporî, polîs û çeteyê ke sey esnafan xo ramojnenê estbî. Cinîyanê ke vera nê vengê xo kerd berz hetê hukmatî ra sey sûcdar ameyî vînayene. Bi qerarê nimitişî û qedexeyan verê ci ame girewtene ke leymê înan vejîyo orte.''

Onluyî ard ziwan ke Şaredarîya Dêrsimî vera nê qewimîyayîşan bajar de cayê ke binê selaheyatê înan de yê ganî mudaxele bikere û vat: ''No têna karê cinîyan nîyo. Ma pêro berpisîyar ê. Eke pê kultur û îtîqatê nê şarî yeno kay kerdene, ganî ma zî xizmetê şarî esas bigerê.''