Meclîsê Cinîyan ê HDPyî yê Dêrsimî çarçewa aktîvîteyanê 25ê Teşrîna Peyêne Roja Têkoşînê Vera Şîdetê Serê Cinîyan de bi tewrbîyayîşê  Hemsereka Pêroyî ya HDPyî Pervîne Buldan kombîyayîşê cinîyan ê elewîyan organîze kerd.

Buldane vêrê kombîyayîşî serê pirdê Sari Saltûkî de waya Gulîstane Doku, Aygul Doku zîyaret kerd û derheqê serebûte de zayanîş girewt. Buldane vat heta destê ma ra bêro ma do teqîpkarê na babete bi.

Buldana ka dima tewrê kombîyayîşê cinîyan bîye vist vîrî ke Dêrsim semedê her kesî/e cayêko taybet o û vat: ''Dêrsim cinîyan ê xoverdayoxan ano vîrî. Eke qala Dêrsimî bibo Sakîneyî, Besêyî û Mazlûm Doganî  yenê vîrî. Coka dewlete bi tewirê ciyayî Dêrsim rê nizdî bena. Dêrsim de têna vera merdiman nê vera xoza, cografya dare ra heta awe ci rê hetê dewlete û sîtetmî ra mudaxale yeno kerdenê. Ewro sere de Gulîstane Doku vera cinîyan ê dêrsimijan konseptêko sîstematîk esto. Her roje bajerêkê ma ra xeberê tecawuz û qirkerdişê cinîyan yena. Vera kurdan konseptêko cîya dewre de yo. Vêşnayîşê daristanan û hêrişê îbadekxaneyanê elewîyan zî leteyê nê yê.''

Buladane bale ante hêrişê vera Çimeyanê Muzurî ser vat: ''Hêrişê goranê kurdan û îbadetxanê û kulturê elewîyan kenê. La rixmê heme hêriş û zextan sere de kurdî û elewîyî heme şar û îtîqatî ewro vera îqtîdarê AKPyî de nêrazîbîyayîşê xo anê ziwan. Kam/e ke vera îqîdarî vejîyeno erzenê zîndanan. Hemserekê ma zî tede wekîl û xebatkarê partîya ma coka zîndanan de yê. Eke ma pêro pîya vera îqtîdarî têkoşîn mekerê no îqtîdar do meverdo ma biciwîyê.''

Buldanê nêvînayîşê Gulîstane Doku zî sey eybê îqtîdarî name kerd û vat: ''Keyeyê Doku 305 rojî yo pirdî ser o kênayê xo paweno. No dejêko zaf pîl o.Ma  bawer nêkenê ke Gulîstane Doku xo kişto, ma şikdar ê ke aya ameye remnayene û qetilkerdene. Coka ma wazenê ke wa cade bêro vînayene û berpisîyarî bêrê cezakerdene.''

Badê qiseykeridşê Buldane kombîyayîş çapenî rê qefilnaye dewam kerd.