Şaredarîyê Bajaranê Pîlan ê Amed, Wan û Mêrdînî hetê Wezîrîya Karanê Zereyî yê Tirkî ra ameyî xespkerdene. Vera naye bi rojan o çalakîye dewam kenê. Dêrsimîjê ke şaredarîya înan zî raştê qeyûmî ameybî, vera xespkeridşê îradeyê şarî razînêbîyayîş ramot.

Hemwelatijan ra Mezlûm Tûgrûlî bale ante texrîbatê ke qeyûman afernayî ser o û va: ‘’Hûkmat vano,’sandiq namûs o’ ma zî nê sandiqan de qeyûmî ritê, eştê teber. La humak îredeyê şarî rê tehemul nêkerd û şaredarîyan de qeyûmî ca kerdî. Na polîtîkaya hêrişkare zirar dana hukmatî zî. Ê bi destê xo peynîya xo anê.’’

Alî Yilmazî qeyûmî sey derbeya vera demokrasî hesibnaye û va:‘’ Na derbeya vera îrdayê şarî ya. Demokrasîya ke ê qalê ci kenê, tena înan rê esta.Ê îradeyê Kurdan nas nêkene. La Kurdî do çi rey verê înan de milê xo çewt nêkerê.

Lutfîye Aydogdû zî nê vatî: ‘’Na meseleya demokrasîyî ya.  Eke cewabo ke hewce keno mero dayene, ê do hîna aver şirê. Beno ke Antalya, Îzmîr û Stenbol de zî qeyûm bêro tayînkerdene.  Coka ganî me pêro pîya vera bêhuqûqîye bivejîye û hêzê bikerê yew.’’

Agît Aralî zî semedê tewirê ci yê vera qeyûman CHP rexnê kerd û va: ‘’Seba ke demokrasî û edelat ameyî binpaykerdene, şar kuçeyan de yo. Kuçe xoverdayîş o. Vera faşîzmî mucadele kuçe de dîyeno. Seba ke zor dîyayo AKP-MHP’yî hêrişê xo zêdînayî. Nê hêrişî do peynîya înan bîyarî. Ma na neheqîye qebûl nêkenê. Şarê Dêrsimî zî ganî berpisîyarîya xo bica bîyaro. Tena bi eşkerayîyêka nuştekîye ya ziwaye nêbeno. Bêvengîye vernîya hêrişanê bînan akena.’’

Hidir Alparsanî zî wina va: ’’Nê qewimîyayîşî ramojnenê ke peynîya hukmatî nêzdî ya. Dimayê hemşaredarîyan û endamanê Meclîsê Şaredarîye, nika zî keyayî wezîfeyî ra yenê girewtene. Ganî heme hetî yew bî û vera xespkerdişê îradeyî vengê xo berz bikerê.’’