Hukmatê AKPyî 15ê teşrîna verêne de qeyûm tayîn kerdbi Şaredarîya Erdîşî û Hemşaredara Erdîşî Yildize Çetîn tepiştbi. Çetîne verî ameye berdene bi Zîndanê Wanî û dima 11ê kanûne de zî surgunê Zîndanê Osmanîye ameye kerdene. Ame parekerdene ke Çetîne wexto ke ameye surgunkerdene destê ci pey ra ameyî kelemçekerdene û 12 saetî wina mende.

Hemserekê HDPyî yê Erdîşî Şakîr Asilî da zanayene ke Hemşaredara Erdîşî  bi nê hawayî surgunê Osmanîye ameye kerdene.

Asilî vat: "Embaza ma Yildize Çetîn mabênê wextêkî kilmî de Erdîş de zaf karî kerdî. La 4 mengan ra dima bi bahaneyanê pûçan wezîfeyê xo ra ameye girewtene. Hemşaredara ma 8 rojan nezaret de mende. Nê prosesî de gêrayî ke delîlêk bivînê la nêdî.
Hemşaredare Çetîn wexto ke amebi destbendkerdene Zindanê Wanî de bi. Keye û avûkatanê aye ra nêame vatene ke do bêra surgunkerdene. Wexto ke surgunê Osmanîye ameye kerdene zî 12 saetan destê ey pey ra ameyî kelemçekerdene û wina ameye surgunkerdene.

Na tedayêka sîstematîk a. Dewlete bi taybetî vera cinîyanê HDPyî teda kena. Na bêtehamulîye hînî bêhuqûqî ya. Ma zanenê ke na bêtehamulîye hînî wina dewam nêkena û no sîstem do bêro wedaritene."