Mabênê dewanê Sorî û Zêvkanî yê qezaya Geverî û wareyan bi fermanê Walîtîya Colemêrgî 24ê teşrîna verêne  de sey 'herêma asayîşê taybetî' amebî îlankerdene. 

Dew, dewek û wareyanê Tilorana Jor, Tilorana Jêr, Yekmala Jêr, Pagê, Kuçe, Hirmîn, Mitirban, Meşkan, Mûşan, Kendalok, Wargenima de zî 25ê teşrîna verêne de operasyono leşkerî dîyabi destpêkerdene.

Ewro zî dewa Sorî de leşkeran domano 16 serrî M.A wexto ke heywanî çêrnayêne bi îşkenceyî destbend kerd. Goreyê agahîyanê ke çimeyanê herêmîyan ra ameyê girewtene leşkeran bi zorî dest na telefonê M.A. ser, dîmen û fotografê telefonî bahane mojnayî û doman nişna wesayîtê zirxînî.

M.A. ame berdene bi Fermandarîya Cendirmeyan a Geverî û heta şewe tîya de mend. Dîya zanayene ke şewe M.A. ameyo berdene bi nêweşxane la gefanê leşkeran ra doktoran raporê derbkerdişî nêdayo domanî.