Walîtîya Wanî pare kerd ke tay dewê herême visîyayî binê 'karatîna'. Labelê eşkera bi ke nê dewan de tebdîrêkê seba weşîye nêame girewtene dewî hetê leşkeran ra ameyî dormegirewtene û dekewtiş û vejîyayîşê dewan qedexe yo.
Temamîya dinya de nija vera vîrusê Korona têkoşîn esto ke heta nika bi semedê mergan. La dewleta tirke herinda ke têkoşînê vera vîrusê Korona têkoşîn bikera Kurdîstan de operasyonanê leşkerîyan kena.
Semedo ke rojane zaf koçberî bi hawayêkê qçaxî Îranî ra derbazê Wanî benê şaristanê Wanî de rîskêko pîl esto. Labelê heta nika Wan de vera vîrusê Korona qet tebdîrêk nêame girewtene.
Kesêko ke Îstanbulî ra serba serweşîye ame dewa Hanî ke tede vîrus ame tesbîtkerdene ame weşkerdene. Dewa Hanî ya Ebexî ya ke nufusê ci 1500 o çend rojan ra nata binê karantîna de ya.
Walîyê Wanî M. Emîn Bîlmezî derheqê babete de eşkerayîyêke daye û pare kerd ke dewa Esenyamaşî ya Elbakî, dewa Hanî ya Ebexî, dewa Alaçayîrî ya Şaxî û dewê Tellîkaya û Çermîkî binê karantîna de yê.
Dewijanê Hanî îfade kerd ke dewe de kedkarê weşîye çin ê, test nêame kerdene û hîrê rojan ra nata dekewtiş û vejîyayîşê dewe qedexe yê ke tede leşkerî estê.
Dewijan vat: ''Dewa ma dormegirewte ya. Leşkeran dekewtiş û vejîyayîş qedexe kerdî. Ma nêeşkenê şorê cayêk. Labelê dewe de kedkarê weşîye çin ê, test nêno kerdene. Dewe de doktor, çawiş û leşkerî estê.''
