Ocaxê xizî yê dewa Darê yê qezaya Çinarî yê Amedî dewijî ecîz kerdî. Ocaxê xizî keno ke heywanî bimirê, warê cuye yê dewijan û xoza texrîb bibê. Dewijan vera ocaxî nêrazîbîyayîşê xo mojna. Dewijan seba ke ocax bêro padayene warê ocaxî de xeymî naybî ro. La leşkeran  xeymî wedaritî. Dormeyê dewe û ocaxî hetê leşkeran ra ame girewtene. Nêno destûrdayene ke domanî şorê dibistane. Dewe bi dronana yena teqîbkerdene.

Dewijan derheqê mesele de Ajansê Mezopotamya reyde qisey kerd.

Dewij Salîh Akpinarî vat: "Ocax hetê dewlete ra yeno pawitene. Yew çala pîle akerde. Heywanê ma, domanê ma şinê uca ma tersenê."

Mehmet Nurî Ozpinarî vat: "Rîyê ocaxî ra ma zaf tengayî ancenê. Ma debarê xo pê keywandarîye kenê. Heywanê ma şîyêne peyê nê girî. La nika pêro rayîrî ameyî xeripnayîşî. Çinar de çend hebî natorî qereqolî estê pêro hêrişê ma kerd. Ma xeyme ronabi uca de . Dewlete ameye rayîrê ma girewtî, ma rê awa tazîkîne eşte.

Îsmaîl Tanî vat: "Domanî hînî nêeşkenê şorê dibistanan. Heywandarîye ha çin bena. Gorê ma çin bîyî. Waştişnameyî ma nênê dîyene. Ne kesêk cewab dano ma ne zî kesêk ma de têkilîyêke keno.

Îbrahîm Ozpinarî vat: "Dewe rew ra yena dormegirewtene. Seba ke ma vera ocaxî xo ver danê leşkerî erzenê dewe ser. Şewe ra heta serê sibayî panzerî, wesayîtê bizirxî, droneyî ma se ro yê nêvindenê. Leşker dorê dewe gênê. ma rê gef wanenê."