Dewlata Tirkî Başûrê Kurdistanî de 4 sivîlî qetil kerdî
Teyareyanê Şerî yê dewleta Tirkî ya îşxalkere herêma Dêraloke yê Başûrê Kurdistanî bombarduman kerde. Netîceyê hêrişî de 4 kesê sivîlî ameyî qetilkerdene û 2 kesî zî birîndar bîyî.
Teyareyanê Şerî yê Tirkî vizêr saetanê vereşanî de herêma Dêralok a girêdayîye Amedîye bombarduman kerde.
Goreyê beyanatê ajansê RojNewsî yê çimeyanê herême 4 kesê sivîlî ameyî kiştene û 2 kesê sivîlî zî birîndar bîyî.
Nameyê kesê ke bombardûman de ameyî kiştene wina yê: Azad Şahîn, Azad Mecîd Seyfo, Rêdar Mihemed Tahîr û Wahîd Ebdulqadîr.
Meyîteê 2 kesan hetê dewijan ra ameyî girewtene û Goristanê Dêralokî de ameyî definkerdene. Goreyê zanayîşan 2 meyîtê bînî zî hîna cayê qewemîyayîşî de yê.
Ame vatene ke dewijî seba ke cenazeyanê bînan zî bigîrê, vera cayê qewimîyayîşî kewte rayîr. 2 kesê birîndarî zî nêweşxane de yenê tedawîkerdene û derheqê rewşa weşîya înan de malumat nêame dayene.
