Qezaya Geverî ya Colemêrgî de polîsê dewleta tirke keyeyan ra gêrenê, bi bahaneya projeyê 'Pusulaya mi Polîs ê' rêçê engiştanê şarî qeyd kenê.

Wekîlê HDPyî yê Colemêrgî Saît Dedeyî derheqê babete de ANFyî rê qisey kerd û dîyar kerd ke kerdişê polîsan huqûqî nîyo. Dedeyî îfade kerd ke dewleta tirke wazena pê kerdişanê winasênan bikera ke şarê Colemêrgî verê ci de çok şoro erdî ro.

Dedeyî vist vîrî ke mîyanê panc serranê peyênan de zafê ci domanî herême de 18 sivîlî hetê dewlete ra kişîyayê û vat: ''Dewlete nê serebûtan de têna kiştoxî pawitî. No serebûtê deqkerdişî zî mojneno ke Colemêrg de qanûnî, qanûno bingeyî û krîterê mîyanneteweyî yenê binpaykerdene. Gever sey herêmêka pîlote ame weçînayene û rêçê engiştanê her kesî qeyd beno. Aseno ke ablûqaya vera şaristanî, qedexeyê ware û daristanan, tepiştiş û îşkenceyê vera merdiman dewlete rê qîm nêkerdo ke nika zî ney kena. Nê nêzdîbîyayîşê faşîstî bi qeydkerdişê rêçan dewam kenê.''

Saît Dedeyî da zanayene ke qanûnan de dîyar o ke rêçê engiştan key eşkenê bêrê girewtene. Dedeyî vat: ''Qanûnî nîyo ke polîsî keyeyan ra bigêrê û rêçê engiştan bigêrê.''