Goreyê zanayîşanê ke çimeyanê herêmîyan ra ameyî girewtene rejîmê tirkî hêzêko newe yê leşkerî bargehanê xo yê Başûrê Kurdîstanî de zêdîna. Heman çimeyan da zanayene ke hûmara leşkeranê baregeh, kozik û çeperan ê herême zî zêdîyaye.

Dewleta tirke ya îşxalkere 15ê nîsane de vera Zînî Wertê û Kampa Mexmûrî hêrişê hewayî kerd. Mexmûr de 3 cinîyî şehîd bîyî. Rixmê têgêrayîşê leşkerî yê dewleta tirke balkêş o ke PDK zî hêzanê xo Zînî Wertê de ca keno. Dewa Zînî Wertê herêma Qendîlî de ya ke binê kontrolê YNKyî de ya.

Baregehî zêdîyenê, îşxalkerîye vila bena

Dewleta tirke bi taybetî serranê peyênan de giranîye daye polîtîkayanê îşxalî yê vera Başûrê Kurdîstanî. Îşxalkerîya tirke hem hetê leşkerî hem zî hetê sîyasî û ekonomîkî ra eşkera bîye. Serranê 1990an ra nata herême de baregehê leşkerî yê tirkan estê Wextê rejîmê AKPyî de hem hûmara baregehan zêdîyaye  hem zî warêkê hîrayî de artêşa tirke ca da xo.

Baregeho verên 1994 de Selahaddîn de ame awankerdene. Nika herême de 15 baregehê Tirkîya estê. MÎT zî her wextî ra zêdêr herême de aktîf o. Serra 2018î ra nata dewleta tirke cayanê neweyan îşxal kena. Herêma Bradostî de tewr tay 20 noqtayê neweyî hetê dewleta tirke ra îşxal bîyî.