Dewlete keyeyê Dînlerî remna, ci rê îşkence kerd nika zî tepişena
Mêrdîn de hêzanê dewleta tirke cinîye-mêrde Faîze û Îbrahîm Dînler remnabî û dima zî ci rê îşkence kerdbi. Dewleta tirke nika zî wazena keyeyê Dînlerî bitepişa.
Herêma Omeryanî ya Mêrdînî de Îbrahîm (73) û Faîze (72) Dînler 22ê teşrîna verêne ameybî remnayene û nêrazîbîyayîşan ra dima dewlete îtîraf kerdbî ke înan cinîye û mêrde destbend kerdê.
Şubeyê Mêrdînî yê Komeleya Heqanê Merdiman (ÎHD) keyeyî reyde pêvînayîş kerdbi û dabi zanayene ke Îbrahîm û Faîze Dînler maruzê îşkenceyê mendî.
Îbrahîm û Faîze Dînler roja 9. ya nezaretî ra dima sewqê dozgerîye bîyî. Dozgerîye bi îdîaya 'endamîya rêxistine' waşt ke Îbrahîm û Faîze Dînler bitepişîyê û keyeyê Dînlerî sewqê mekheme kerd.
Wina pawîyeno ke keye ewro do vejîyo verê mehkeme.
