Komeleya Rojnamegeran a Dîcle Firatî (DFG) bi wesîleya Roja Rojnamegaranê Ke Xebitîyenê ya 10ê çeleyî eşkerayîye kerde. DFGyî vist vîrî ke Tirkîya de serra 1961î ra nata tarîxê 10 çeleyî bi vurnayîşê nîzamnameyeyo ke heqanê rojnamegeran paweno  sey Roja Rojnamegeranê Ke Xebitîyenê yeno fîraz kerdene.

Eşkerayîya DFGyî wina ya:

"Roja 10 çeleyî ya ke hetê îqtîdarê ê dewirî ra sey roja roşanî ameye hesibnayene nê rojan de sey roja roşanî nêna fîrazkerdene.Tirkîya de bi taybetî wextê rewşa îstîsnayîye de bi KHKyan 179 sazgehê medya, 53 rojnameyî, 37 îstasyonê radyoyî, 34 televîzyonî, 29 weşanxaneyî, 20 kovarî û 6 ajansê xeberan ameyî girewtene. Nê prosesî de karta zerde ya 3 hezar û 804 rojnamegeran ameyî batalkerdene.

Zaf kesî Tirkîya sey 'nêweşxaneyê tewr pîlî' pênas kenê. Tewr tay 100 rojnamegerî zîndanan de yê. Bi taybetî vera çapemenîya muxalîfe tedayêka pîle esta. Serra 2019î de rojnamegerî ameyî destbendkerdene, tepiştene û hukmkerdene û bi nê hawayî warê karê xo ra ameyî dûrvistene. Coka merdim eşkeno vajo Roja Rojnamegeranê Ke Nêeşkenê Bixebitê. Naye ra ma na roje fîraz nêkenê.

Bi wesîleya Roja Rojnamegeranê Ke Xebitîyenê ya 10 Çeleyî ma rojnameger Meîn Goktepe yo ke 24 serrî verê cû 8ê çeleyî de Albeykoyê Îstanbulî de amebi destbendkerdene û bi îşkence amebi qetilkerdene bi rêzdarî yad kenê. Ma venga pêro hemkaranê xo danê ke seba ke ma rastîye roşnî bikê û biresnê komelî vera şîdetî ma pîya têkoşîn bikê."