Warê Werxelê yê Herêmanê Pawitişî yê Medya de dîmenê bombayanê gazî yê ke artêşa tirke ya îşxalkere şuxilnayê û gerîlayan fatisnayê, weşanîyayî.

Serê yew bombaya gazî de seba tîyê ci 'bombaya destan a gazî' û seba wextê berardişê ci zî '06.2014' nusîyeno.

Dewleta tirke ya îşxalkere 14ê nîsane ra nata bi çekanê kîmyewîyan û bombayanê qedexekerdeyan hêriş kena. HPGyî 15ê kanûne de bîlançoya 8 mengan eşkera kerdbî û dabi zanayene ke nê 8 mengan de dewleta îşxalkere 3 hezar û 152 reyî bombayê qedexekerdeyî şuxilnayê. Tîpê nê bombayan zî wina yê: bombayê fosforî, termobatîkî, taktîkî û çekê kîmyewîyî.

Goreyê Peymana Vera Çekanê Kîmyewîyan şuxilnayîşê bombayanê gazî qedexe yo ke dewleta tirke zî na peymane îmza kerde.

Keyepelê Rêxistina Qedexekerdişê Çekanê Kîmyewîyan (OPCW) de zî wina nusîyeno: ''Eke ajanê kontrolkerdişê îsyanî madeyanê sey gazê çimvêşnayîşî sey metodêkê şerî bişuxilnê no sey çeka kîmyewîye do bêro hesibnayene.'' OPCW rixmê nê krîterê xo zî verê hêrişanê kîmyewîyan ê dewleta tirke de bêveng a.