Dişmenîya PDKyî ya vera kurdan û mergê Adugîtî

Metîn Adugît zulmê dewleta tirke ra şi Başûrê Kurdîstanî la zîndanê PDKyî de dinyaya xo bedilnaye. Sîyasetmedaranê kurdan qala zulmê PDKyî kerde.

Metîn Adogîto 45 serre zî nînan ra yew bi. Adugîtî vizêr zîndanêkê PDKyî de dinyaya xo bedilnaye.

Adugît Hewlêr de xebitîyayêne. 7ê teşrîna peyêne ya 2020î de Adogît hetê Asayîşê Hewlêrî ra tepişîya û erzîya zîndan. Keyeyê Adogîtî a roje ra pey tira xeberêke nêgirewte. Tewr peyên avûkatê Adogîtî Hewlêr de aqîbetê ci persa. La mesuldaranê asayîşî tira vat: ''Metîn krîzê qelbî ra merdo.''

Metîn Adugît serranê 2009-2012î de Serekê BDPyî yê qezaya Ebexî ya Wanî bi. Serra 2011 de binê nameyê operasyonanê KCKyî de tepişîyabi û 2 serran zîndan de mend. Zulmê dewlete ra Adogît neçare mend ke koçê Başûrê Kurdîstanî bikero.

Metîn babîyê 5 domanan o û lajêkê ci zî sey gerîla şehîd bibi. Pawîyeno ke cenazaya Metînî Ebex de bêra definkerdene.

Metîn seba ke Hewlêr de bixebito muracatê asayîşî kerd la hetê Asayîşê PDKyî ra tepişîya. Rixmo ke Adugît nêweşê qelb û şekerî bi zîndan de dermanê ci nêdîyayî ey.

Sîyasetmedaranê kurdanê ke sey Adugît neçare mend ke derbazê Başûrê Kurdîstanî bibê qala zor û zorbazîya PDKyî kerde.

Sîyasetmedaran vat: ''Tîya maneno serranê 1980an ê Tirkîya. PDK û asayîşê PDKyî bi hawayêkê xirabî nêzdîyê sîyasetmedaranê Vakurî benê. Rewşa Mexmûrî zanîyena. Mesuldarê na şermîye PDK yo.Cinîyê diganî nêeşkenê şorê nêweşxane û pa domananê xo mirenê. 2 mengan de 50 roniştoxê Mexmûrî hetê PDKyî ra tepişîyayî. PDK kurdan rê wina barbarîye keno. Wefatê Metînî ney îsbat keno. Ê bi hawayêkê eşkerayî ma rê vanê ke ê do ma teslîmê Tirkîya bikerê.''