Fermandaranê Merkezê Qerargahî yê HPG’yî ra Dr. Bahoz Erdalî bi wesîleya serrgêra 15’ine ya Hemleya 1’ê Hezîrane Stêrk TV’yî rê qisey kerd.

Qiseykerdişê Erdalî ra tayî cayî wina yê:

‘’Rayber Apoyî vera komploya mîyanneteweyîye  gama stratejîke eşte û 1999 de prosesê adirbirnayîşî da destpêkerdene. Têgêrayîşê ma zî dest bi mucadeleyêkê neweyî kerd. Rayber Apoyî semedê çareserkerdişê problemê Kurdî şansêk da înan la dewleta Tirkî no şans nêşuxulna 5 serrî xerc kerdî. 2002-2003 de bi eşkera ke bê tasfîyekerdişê ma yewna amancê înan çîn o. Semedê têgêrayîşê ma qerarê Hemleya 1’ê Hezîrane ya 2004’î xoverdayîş, mucadele û cuye de hewceyêko tarîxkî bi. AKP’yî waşt ke şarê Kurdî bixapîno. Bi sîyasetê teslîmgirewtişî nêzdîyê ma bîyî. La gerîla û şarî qerarê xo hetê xoverdayîşî ra da.

Hemleya 1’ê Hezîrane  Têsîrêko Gird Ramot

No qerarê ma weşê hêzanê mîyanneteweyî zî nêşi. La şarê ma no qerar sey Hemleya 15’ê Tebaxe hesibna û paştî daye ci. Ma no qerar  girewt ke ma  dengeyanê neweyan ê Rojawakewtena Mîyanêne de sey hêzêk ca bigê û ma tîya bîyî aktorêk. Hemleya 1’ê Hezîrane her ca de tesîrê xo ramot. Başûr de zî hêzê da şarê ma. Vernîya şarî akerde. Na hemleye ramojna ke  heta ke azadîya Kurdan û Kurdistan çînebî  ameyîşêko roşt ê dewleta Tirkî çirey çîn o. Eke na hemleye çîneyêbîne  gerîla xo feskerdêne. Şorişê Rojawan nêbiyêne û vernîya DAÎŞ’î nêameyêne girewtene. Na hemleye heme leteyê Kurdistanî kerdî bihêz.

Kurdistan de Xoverdayîşêko Xurt Esto

Nê 15 serran de tena gerîla mucadele nêkerd. Çarçeweya paradîgmaya newî ya Rayberîye de şarê ma mucaledeyê xo kerd xurt. Hetê bînî ra rêxistinbîyayîşê sîyasî û cimatkî aver şîyî. No serkwtişo gird ê şarê ma bi. Şarê ma vera şerê çînkerdişî her ca de xover da.  Hem zindan hem zî teber de hetê welatperwer û şorişgêran ra  xoverdayîşêko erjaye ame dayene. Dayîkanê ma zî hêzê xo yo gird ramot û faşîzmê dewleta Tirkî bêçare verda. Xora gerîla her roje xo newe keno. Gerîla hêzêko  afernayox o. Bêşik o ke şer semedê ma çetin o la ma vera wehşetê dewleta Tirkî  35 serrî yo şer kenê. Îradeyê gerîlayê Kurdistanî zaf gird o. Ewro her cayê Kurdistanî de gerîla mucadele keno û bedel dano. Welat de şerêk esto. Gerîla sîyasetê çînkerdişî pûç vejeno.  Garîla heta ewro senî ke derbeyê girdi dayî dişmenî rê do ewro ra tepîya zî piro de.

Gerîla Heme Hêrişanê Dewleta Tirkî Pûç Vejeno

Dewleta Tirkî Vakur de her firset de operasyon virazena. Rojawan de zî her firset de hêriş kena. Başûr de zî wina. Operasyonê Xakurkê ne verên ne zî do peyên bo.  Xora 35 serrî yo ke hêriş kenê. Yanî Başûrê Kurdistanî de şer esto. Îşxalkarîya dewleta Tirkî û tewirê partîyanê sîyasîyan ê Başûrî, Başûrê Kurdistanî keno sahaya şerî. Gerîla hêrişê Xakurkê zî do pûç vejo. Par rayêk înan ceribna ameyî qilêk tepişt û wext ra bedelê naye giran danê. Her roje çend leşkerê înan yenê kiştene. Bêşik o ke gerîlayê Kurdistan cewabo ke ê heq kenê dano înan. Başûr, Vakur çayê Kurdistan beno wa bibo vera hêrişan gerîlayê Kurdistan cewabê înan dano.

Ganî Mesajê Rayber Apoyî Raşt Bêro Famkerdene

Rayber Apo gird fikiryeno, dûrî vîneno û qeraro cîddî gêno. Bi mesajê xo yo peyên no reyna ramot.  Rayber Apo senî ke hêzê çareserîye yo, rayîrê çareserîye zî nîşan dano. Ganî heme muxatabê ey mesajê ey raşt fam bikerê û erjê ci bizanê. Tena hêzê Kurdistanî nê hêzê mîyanneteweyî zî ganî nê mesajî raşt biwanê. Ê ke hesabê înan Rojakewtena Mîyanêne de estî ê zî. Şarê Kurd û hêzê ci ey rê giredaye yê. Çew nêeşkeno nayî nêvînayîş ra bêro. Hêzê mîyanneteweyî heta ke îradeyê şarê Kurdî nas mekerê û hêzê  PKK’yî hesab mekerê Rojakewtena Mîyanêne de nêeşkenê siyaset bikerê. Ganî heqîqetê PKK’yî bêro qebûlkerdene. No şar sey heme şaran wazeno ke bi anor û  azadîya xo biciwîyo. Nizdîbîyayîşê sey Lozanî hemenan ra dano vîndîkerdene. Kurdî sey hêzêk ewro eşkenê dengeyan bibedilnê. Coka hêzê mîyanneteweyî wa Rayber Apoyî biwanî û sîyasetê xo yê klasîk ê vera ma newe ra çim ra ravênê.’’