Akademîsyenê Zanîngehê Hewlêrî Dr. Raid Rifedî derheqê estbîyayîşê dewleta tirke yê vera Başûrê Kurdîstanî de qisey kerd û vat: ''Têna vera îşxalê dewleta tirke nê vera îşxalê kulturelî zî serewedaritişêko pîl lazim o.''
Akademîsyenê Zanîngehê Hewlêrî Dr. Raid Rifedî derheqê hêrişanê îşxalî yê dewleta tirke de ANFyî rê qisey kerd.
Dr. Rifedî baregehê neweyî yê dewleta tirke vistî vîrî û vat: ''Dewleta tirke Başûr de qasê 40-50 baregehê leşkerî viraştî. Hukmatê Herêma Kurdîstanî zî destûr da naye. Ganî vera hêrişanê dewleta tirke tewirêko cidî bêro mojnayene. Dewleta tirke verî ke Başûr îşxal bikera wazena mezgê ciwanan îşxal bikera. Ganî bi rayîrê sersefîrîyan Hukmatê Herêma Kurdîstanî verê nê hêrişan bigêro. Dewleta tirke pê gefan xo seba hêrişanê Başûr û Rojawanî amade kena. Dewleta tirke bi bahaneya asayîşî hêrişan kena. No nêno qebulkerdene.''
Dr. Rifedî da zanayene ke roşnvîr, Wezîrîya Roşnvîran, dezgehê hunerî yê Başûrî vera hêrişanê kulturelan ê Tirkîya bêveng ê û vat: ''Herinda ke kultur û hunerê Başûrê Kurdîstanî bêrê pawitene hêrişê kulturelî yenê kerdene. Têna vera îşxalê dewleta tirke nê vera îşxalê kulturelî zî serewedaritişêko pîl lazim o.''
