Vervatoxê Heyetê Şingalî yo ke şibi Bexdad Faris Herboyî derheqê pêvînayîşanê înan û peymana Şingalî de ANFyî rê qisey kerd.

Qiseykerdişê Herboyî ra beşêk wina yo:

''9ê teşrîna verêne de mabênê hukmatê Iraqî û Hukmatê Herêma Kurdîstanî de Şingalî ser o peymanêke ameye kerdene. Na peymane di lingan ser o ameye kerdene; oyo verên lingê asayîşî yo û oyo diyîn zî lingê îdarîyî û agêrayîşê koçberan o.

Şarê ma yê Şingalî, şarê ma yê teberî û dostê ma vera na peymane vejîyayî. Labelê vatişê 'Ma qebul nêkenê' seba wedaritişê na peymane qîm nêkenê. Êyê ke na peymane îmza kerde, temsîlkarê êzidîyan nîyê, eqsê ci înan êzidîyî war verdayî.

Na peymanêka sîyasî ya. Mustafa Kazimî seba ke weçînayîşê 2021î de paştdayîşê PDKyî bigêro na peymane îmza kerde. 

Dima ke Kazimî şi Washington DYA tedaya ey kerd ke peymane îmza bikero. Xora Neteweyê Yewbîyayeyî, DYA û Fransa çimdarê na peyman ê. DYA bi nê hawayî wazena Hewlêr û Bexdad de estbîyayîşê xo bipawa.

Heyf ke mîyanê nê hesab û planan de şar û dezgehê Şingalî çin ê. Labelê hesabêkê şarê Şingalî zî esto. Komelê êzidîyan wayîrê temsîlkaran, hêz û îradeyî yo. Ganî nînan reyde zî pêvînayîşî bisameyêne kerdene. Vatişê sey 'Şingal de aramîye çin a, ma do şorê Şingal de nîzamêk virazê' zûr û bêbextî yê.

Medyaya PDKyî zî na babete de şar xapînena û vana 'Pêşmergeyî do şore Şingalî.' La peymane de yeno vatene ke hêzê sey artêşa Iraqî, Haşdî Şabî û Emnel Wetanî do bêrê. Şingal hewceyê nê hêzan û pêşmergeyan nîyo. Ganî hêverî nê hêzî êzidîyan ra uzrê xo biwazê.

Ganî her kes bizano ke gonî û destkewteyanê şarê ma ser o qet yew peymane do nêra qebulkerdene. Ma na peymane do ca nêarê.

Ma xeylêk rêxistin, partîyanê sîyasîyan  reyde pêvînayîşî kerdî. Tay terefan na peymane nêeşnawita zî. Înan paştdayîşê xo yê seba Şingalî ard ziwan. Hema hema pêro terefan soz da ke do na peymane teqîb bikerê û vera ci tewirê xo bimojnê.

Ma venga şarê xo kenê ke bi nê propagandayan mexapîyo. Pê vatişê 'heqê mi ho çade yo' kes heqê çewî nêdano. Ganî merdimî heqê xo bivisnê destî.''