Nuştox, roşnvîr û çimdarê sîyasî yê kerkûkijî Letîf Fatîh Ferecî derheqê Hemleya 'Wext Wextê Azadîye' ya KCKyî de ANFyî reyde qisey kerd. 

Ferecî qala tecrîdê vera Rayberê Şarê Kurdî Abdullah Ocalanî kerde û vat: ''Tecrîdkerdişê Ocalanî yeno manaya tecrîdkerdişê pêro Kurdîstanî. Coka eke Ocalan azad bibo aramî haştîye do bêrê herême. Hemleya KCKyî  seba wedaritişê tecrîdî zaf girîng a. Ocalan bi taybetî Rojawan û Vakurê Kurdîstanî de tek muxatabê çareserîya meseleyan o.''

Letîf Fatih Ferecî wina qiseykerdişê xo dewam kerd: ''Dewleta tirke xîret kena ke PKK û kurdan yewbînan ra cîya bikera. La heta nika ser nêkewte. Hînî şarê Tirkîya zî pê hesîya ke bê Rayber Apo qet yew mesele çareser nêbena. Êyê ke Ocalan tecrîd kenê xo zî asta dinya de tecrîd kenê. Coka pêro sîyasetê Tirkîya binê tecrîdî de yo.''