Hukmatê AKPyî 23ê adare de şaredarîyanê HDPyî Êlih, Farqîn, Lice, Egîl, Norşîn, Gokçebag û Halfelî rê qeyûmî tayîn kerdî û hemşaredarî destbend kerdî. Hemşaredarê Halfelî Hasan Safa yo ke dest nîya wezîfeyê ci ser, dima ame tepiştene.

Wekîlê HDPyî yê Îdirî Habîb Eksîkî derheqê tayînkerdişê qeyûman de ANFyî reyde qisey kerd. Eksîkî vat: ''Tayînkerdişê qeyûman bêhuqûqî ya. Destsernayîşê îradeyê şarê kurdî nîşaneya eşkera ya dişmenîya AKPyî ya vera kurdan a. Ne şarê ma ne zî HDP do na bêhuqûqîye qebul bikerê. Wextê têkoşînê vera Korona de zî înan dest na şaredarîyanê ma ser. Nêzdîbîyayîşêko winasê AKPyî rê şino. Şarê ma AKP sindoqa weçînayîşî de do bifatisno. Şarê ma do qet dişmenîya AKPyî ya vera kurdan qebul nêkero. 

Şaredarîyanê ke destê nîya ser şarê ma rê xizmetê weşî kerdêne. Bi taybetî Şaredarîya ma ya Halfelî babeta xizmetî de sey mîsalêk bîye. AKPyî nê xizmetî dîyî û dest na Halfelî ser. Nê wextî de ke pêro dinya vera vîrusê Korona paştî dana yewbînan AKPyî dest na şaredarîyanê ma ser.''