Gulîstane Doku 5ê çeleyî ra nata vînîbîyayeya. Çalakîyê wendekaranê Zanîngehê Munzurî yê Seba Gulîstane Doku dewam kenê. Wendekaranê ke şewe kampusê zanîngehî de çalakîya protestoyî kerdbi kampus de zî çalakîya xo dewam kerde. Wendekaran waşt ke rewşa Gulîstane bêra kifşkerdene û xebatê cigêrayîşî bêrê zêdekerdene.

Gulîstane ça de ya?

Bi seyan wendekaran waşt ke slogananê ''Gulîstan ça de ya?'', ''Dêrsim bêveng mebe, wayîrê Gulîstane bivejîye'' reyde seba Gulîstane çalakîya roniştişî bikerê.  Rektor Ubeyde Îpekî ame hetê wendekaran û ard ziwan ke xebatê cigêrayîşî dewam kenê û peygoşîyêke çin a. Rektorî waşt ke wendekarî çalakîya xo biqednê. Wendekaran da zanayene ke çalakîya înan têna seba Gulîstane Doku ney seba serûbatanê ke zanîngeh de qewimîyenê yê û serebûtê Cem Tekînogluyî vist vîrî ke wendekarê cinîyî yê zanîngehî tacîz kerdbi. Rektor wexto ke wendekaran bale ante na mesele ser kampus terikna. Wendekaran vera rektorî bi sloganê ''Rektor îstîfa bikero'' nêrazîbîyayîşê xo mojna. Dima wendekaran rayraşîyayîşêk kerd û çalakîye bi sloganan qedîyaye.

Şikdar  Zaînal Abarakov Binê Çimdarîye de Yo

Hetê bînî ra ame îdîakerdene ke gumandaro verên ê serebûtê Gulîstane Doku Zaînal Abarakov rema. Îdîa ra dima keyeyê Dokuyî Walîyê Dêrsimî Tuncay Sonel û mudirîyetê asayîşî reyde pêvînayîşêk kerd. Walî pêvînayîş de da zanayene ke Zaînal Abarakov nêrema û seba ke derheqê ci de delîlê qîmî çin ê nika binê çimdarîya înan de yo.