Seba ke cografyaya Kurdîstanî bîye 4 parçe cuye seba kesanê ke herêmanê sînorî de ciwîyenê hîna zor a. Kurdî têkilîyanê merdimîye û bazirganîye ra neçare manenê ke sînoran ra bi hawayêkê 'îlegalî' derbaz bibê.  Dewa Roboskî ya qezaya Qilebanî ya Şirnexî de zî na rewşe 100 serrî ya ke wina ya. Qirkerdişê Roboskî yo ke 28ê kanûna 2011î de ame meydan ra dima 'bazirganîya sînorî' reyna bibî rojdem.

Qirkerdişê Roboskî ra dima bi seyan qantirê dewijanê Roboskî ameyî qetilkerdene. Qantirê  Kadrî Encuyo ke kekê ci Qirkerdişê Roboskî de amebi qetilkerdene zî hetê dewleta tirke ra qetil bîyî. Encuyî ard ziwan ke bazirganîya sînorî karê pîrikanê înan zî bîye û vat: "Ma waştbi ke keyeyê xo tamîr bikerê coka ma şîyî bazirganîya sînorî bikerê. Ma zanayêne ya ma do bêrê tepiştene yan zî qantirê ma do bêrê kişenê. Rojêke ma bi 4 qantiran şîyî sînorî. Ma vengê guleyan eşnawitî. Qantirêkê ma amebi panayene. Seke leşkeran înat kerd ke pêro qantirê ma bikişê guleyî varnayêne. Ma firsendêk dî ma qantirê xo xelisnayî.

La rojêka bîne leşkeranê tirkan qantirêkê embazê ma ro na. La seba ke şewe bîye ma pê nêhesîyayî. Ma serê sibayî dî ke birîndar o, xora dima zî merd."