Endama Konseya Rayberdişî ya KJKyî Zêrîne Rûken bi wesîleya serrgêra şehadetê Zîlane (Zeynepe Kinaci) ANFyî rê qisey kerd.

Qiseykerdişê Zêrîne Rûken ra beşêk wina yo:

''Embaze Zîkane 30ê hezîrana 1996î de, embaze Sema Yuce 17ê hezîrana 1998î de, embaze Gulane 7ê hezîrana 2002yî de şehîd bîyî. Ma şexsê şehîdanê hezîrane de pêro şehîdanê xo yad kenê. Ganî raştîya şehîdan têna çalakîyanê înan ser o nêra ercnayene. Cewherê nê çalakîyan de ganî tewiro îdeolojîk, qerardarîya îdeolojîke û xurtbîyayîşê rêxistinî bêrê dîyene. Şehîdî ma rê krîterê afernayîşî yê. Ma perwerê pratîkanê şehîdan ê.

Rayber Apoyî embaze Zîlane sey krîter û xeta awanbîyayîşê PAJKî kerde sembol û îdeolojîya xelisnayîşê cinîyan îlan kerde. Raştîya Zîlane hende pîl a ke ganî têna sey çalakîya fedayîye ya serkewte nêra ercnayene. Rayberîye zaf giranîye daye çalakîya aye ser. Aya ke ewro Zap û Avaşîn de xo ver dana û ser kewena, xeta Zîlanan a. Tradîsyonê xoverdayîşî yê Şehîde Zîlane ewro Zap, Avaşîn û Metîna de dewam keno

Embaza ma Letîfe Selamet (Zîlane Pepûle) hezîrana 2006î de Merîwan de şehîd bîye. A teqîbkerdoxa Zîlan a. A Rojhelatê Kurdîstanî de vurîyaye bîye eşqê azadîye. Raştîya cinîyan ê kurdan xoverdayîş o. Ewro Herêmanê Pawitişî yê Medya de cinîyê kurdî bi nê hawayî xo ver danê. Embaze Zîlane Pepûle şehîda verêne ya YJRKyî ya. A Rojhelatê Kurdîstanî de bîye îrade û hişmendîya azade. A Merîwan de wexto ke şarî reyde kombîyayîş kerdêne ameye qetilkerdene, dima zî cenazaya aye erdî ra ameye kaşkerdene. A warê leşkerîye de fermandare, warê sîyasîyî de cinîyêka rêxistinkerde bîye. Aye heta peynî xo ver da û nameyê xo tarîxî ser o nuşt.

Dewleta tirke ya faşîste nika pê çeka kîmyewîye hêrişê gerîlayan kena. Dinya vera şerê Ukrayna hîsgerîye mojnena la vera şerê serê kurdan bêveng manena. Dewleta tirke ha îşxalê xo kena hîra û şerê Ukrayna vurnena firsendî. Dewletê ke qala huqûqî û merdimîye kenê, paştî danê îşxalê dewleta tirke. Çunke menfaatanê xo fikirîyenê.

PDK zî mîyanê nê şerî de, hetê dewleta tirke de bi hawayêkê aktîfî ca gêno. PDK bîyo hêzêko xayîn. PDKyo ke îqtîdarê keyeyêkî yo, kurdan rê îxanet keno û seba tasfîyeya PKKyî têgêreno. Dewleta tirke sozê îqtîdar û zengînîye dana PDKyî. Şarê kurdî hînî rîyê PDKyî vîneno. Şarê kurdî, hêzê mîyanneteweyî hînî rayîrê nêdanê ke PDK îqtîdarê xo rê dewam bikero. Rayber Apo 24 serrî yo binê tecrîdêkê giranî de yo. Rayber Apo rayberê şaran û cinîyan o. La PDK hema nêeşkeno eşîrêke îdare bikero.  Ganî şarê kurdî vera xayînî û îşxalî hetê gerîlayan de ca bigêro. Ma hemleya xo ya azadîye bi azadkerdişê Kurdîstanî û Rayber Apoyî ser bivisnê.''