Yewîyê JOHî çarçewaya talîmato ke Wezîrê Karê Zereyî Suleyman Soyluyî Walîtî, Cendirme û Emnîyet rê erşawitbî de qezaya Sarayî ya Wanî de dest bi kontrolê xidaye kerdî.

Hewteyo verên Wezîrê Karê Zereyî Suleyman Soyluyî Walîtî, Emnîyet û Cendirmeyê 32 bajaran rê talîmatêk erşawitbi. Talîmat de wina amebî vatene: “Ganî hêzê dewlete market, dikan û sewbîna cayê ke bi hawayo toptan çîyan roşenî de rotişê ariş, şeker, konserve, helawe, rîçale û sewbîna bêrî kontrol kerdene û îstîxbarat bidîyo dewlete. Kesê ke xida û çîyê cuye wesayîtê xo de kirişenî, ganî derheqê rayîr û keyeyê xo de melumatan bido.”

Endamê JOHî şîyî dewa Şerefhane ke girêdayeyê qezaya Sarayî ya Wanî ya û 2 dikanê ke dewe de yî, kontrol kerdî. Endamê JOHî yew bi yew kel-melanê dikanan hûmaritî û dikandaran tehdît kerdî û vatî ‘ganî şima kesê ke bi hawayo toptan çîyan herînenî, melumatê ci bidî ma’.

AJANÎYE DANÎ FERZ KERDENE

Parlamenterê HDPyî yê Wanî Murat Sarisaçî babete ser o va ‘kurdî bi mehneyanê tewir bi tewiran binê zextan de yenî tepiştene û ceza dîyena înan. Sarisaçî dewamê qiseykerdişê xo de wina va: “No, dewê ke HDPyî tewr zaf rayî girewtî de yeno dest pêkerdene. Tena kontrol nîyo, dewijan ser o ajanîye yena ferz kerdene. Ê nêşênî bi nê kerdişan kurdan teslîm bigîrî.”