Endamê Komîteya Merkezî yê PKKyî Kasim Engînî derheqê sîstemê kapîtalîstî û janî de ANFyî reyde qisey kerd. Qiseykerdişê Engînî ra qismêk wina yo:

''Sîstemo modernîst ê kapîtalîst bi hawayêkê cidî fatisîyeno. Kapîtalîzm seba meselyanê pîlan nêeşkeno bibo cewab.  Sîstemo kapîtalîst pê hêzanê îqtîdarî yê rastgîr-muhafazakaran xîret keno ke xo newe ra biercno, estbîyayîşê xo dewam bikero. Mîsalê ney Erdogan o. Erdogano ke Tirkîya, Kurdîstan û Rojhelatê Mîyanênî de teror keno do hêrsê şaran ê vera faşîzmî zêdîneno.  Balkêş o ke wextê janê vîrusê Korona de êyê ke ma înan sey otorîter, rastgîr û tekperest pênase kenê sey yewbînan têgêrenê. Xîret kenê ke nê janî seba xo set firsendêk bixebitnê, polîtîkayê hêrişkerî zêdêr bîyarê ca û hîna zaf dewlemend bibê, xizanan zî terkê mergî bikerê. Kapîtalîzm çinkerdişê komelkîbîyayîş o. Merdimîye pê komelkîbîyayîşî esta, komelkîbîyayîş zî hetkarî ya.

Kapîtalîzm genanê ke xoza de çin ê, aferneno coka beno belaya sereyê merdimîye. Bedelê nê kayî zî tim giran bi. AIDSî ra bigêrê heta Korona çimeyê nêweşîyan ê pêroyînan netîceyê xîretanê kapîtalîzmî yê. Ganî bêro zanayene ke vurnayîşê bingeyê xoza, genetîkê organîzmayan, endustrîyalîzm benê sebebê jan û felaketan.Paketanê çareserî yê kapîtalîzmî vera vîrusê Korona îflas kerd û sîstemê dewletperestî yê ke benê sebebê têgêrayîş û kaosî kewtî cigêrayîşî ver. Rewşêka winasêne de ke kapîtalîzmî îflas kerdo cuya komunale yanî cuya komunuste vurîyayî hêvîya cuye ya merdimîye. Cuya newe kewte rojdemê merdimîye. Aya ke ganî naye ra pey bêra kerdene, cuya komunale, cuya hempar a.''