Endama Komîteya Rayberdişî ya PKKyî Xalîde Engîzek derheqê Qirkerdişê Parisî yê 23yê Kanûne de ANFyî rê qisey kerd.

Qiseykerdişê Engîzeke ra tay noqtayê girîngî wina yê:

''Qirkerdişê Parisî yê 23yê Kanûne dewamê Qirkerdişê Parisî yê 9ê Çeleyê 2013î yo. Ma do qesasê embazanê xo, qesasê şarê xo yê welatperwerî qetî bigêrê. Îqtîdarê AKP-MHPyî seba ke estbîyayîşê ci dewam bikero wazeno şarê kurdî û têgêrayîşê azadîye çin bikero coka hêrişê xeta azadîye ya cinîyan keno. Eşkera yo no qirkerdiş hetê dewleta tirke û MÎTî ra ameyo kerdene. Qirkerdişê Parisî sîyasî yo. Qirkerdiş bi plan û bernameyê MÎTî ame kerdene. Ma sey têgêrayîşî do na mesele war meverdê. Eke Qirkerdişê 9ê Çeleyî de mesuldarî biameyêne cezakerdene no qirkerdiş do nêameyêne kerdene.

Dewleta tirke zemînî dano îstîxbarat û çeteyan. Seba ke çew dewleta tirke ra hesabê hêrişanê ci yê vera Rojawanî nêperseno a zî verê çimanê pêro dinya de qirkerdişê winasênî kena. Dewleta tirke 8 mengî yo hêrişê Zapî kena la nêeşkena tira netîceyêke bigêra. Coka teber de hêrişê şarê ma kena. Dewleta tirke bi nê hêrişî waşt qesasê DAÎŞî zî bigêra û nê hêrişî de embaze Evîna ke vera DAÎŞî şer de serkêşîya kerda, qetil kerde. Dewleta tirke ya faşîste seba ke sîstemê serdestîya camêrdan temsîl kena wina hêrişê cinîyan kena. Dewleta Fransa xîret kena ke nê hêrişê vera cinîyêka serkêşe sey cînayetêkê edlîyî bimojna. No nêno qebulkerdene. No serebûtêko sîyasî, qirkerdişêko sîyasî yo û raşta raşte îradeyê şarê kurdan û cinîyan ê kurdan kerdo hedef.

Şarê ma vera nê qirkerdişî tewirêko rûmetîn mojna. Dinya dî ke şarê ma senî wayîrê têkoşeranê xo vejîyeno. Şarê ma şarêko rêxistinkerde yo. Ma nê xoverdayîşê şarê xo selam kenê. La ganî şarê ma bizano ke têkoşînê ma, armancê ma pîl ê. Armancê ma awankerdişê dinyayêka demokratîk û azad a. Embazê ma Evîne, Mîr Perwer û Abdurrahman gonîya xo seba şorişê Kurdîstanî rijnaye. Şarê ma ganî perwerê şehîdan bibo. Ganî şarê ma dostanîya xo ya bi şaranê Fransa hîna pîl bikero.''