Endamê Komîteya Şaran û Bawerîyan a KCK’yî Cîhan Erenî bi wesîleya Roşanê Remezanî ANF’yî rê qisey kerd.

Erenî şexsê dayîkanê laçigsipîyan de roşanê şarê Kurdî û heme Muslumanan bimbarek kerd û va: ‘’ Roşan kulturo cimatkî yo ruhê ci de hem madî hem manavî parekerdiş esto. Çi heyfo ke ewro ne Tirkîya ne Rojakewtena Mîyanêne de şayîya roşanan çîn a. Şexs û grûbê ke vanê ma Musluman ê binê nameyê dewlete de şarî rê zext û neheqîye kenê. Bitaybetî zî AKP Îslamî  şuxulneno. Xo bi naye weye keno. Vanê ma dîndarê la goreyê Îslamî tê nêgêrenê. Menga bimbarêk de bi hêrişê  polîsan ê vera  dayîkanê laçigsipîyan ma no reyna dî. Îxtîmalo gird o ke înanê ke talîmatê hêrişî dayêne û polîsanê ke hêrişê dayîkan kerdêne roje tepiştêne. Ganî cimatê Musluman naye bizanê dînê serdestan û nêçaran yew nîyê. Hz. Mûhammed ra zî şar, nêçar, bindestî û serdestî heman çî fam nêkenê. Îslam de rojê sembolê aşitîye û way-biratîye yo. Roşan yeno manaya elalet û paştdayîşî. Îsam de guneyo tewr gird zûr a. Alemê Îslamî de serdestî bi zûranê girdan cimatî xapînenê. Serdestî vatiş de dîndar ê kerdiş de vera dînî yê. Goreyê Îslamî nê munafiq ê. Çi heyfo ke ewro xeta munafiqan hakîm a. Şexsê Erdoganî de ma nê vînenê. Xeylî gune û sûcî bi tobekerdiş ef benê la efê munafiqîye çîn o.’’

Erenî bale ante hêrişê îqtîdarî yê serê Kurdan û wina dewam kerd: ‘’Nizdîbîyayîşê Erdoganî  yê vera Kurdan munafiqîye ya. Vano ‘Way-birayê mi yê Musluman’ û qetil keno, ziwanê ci qedexe keno, dest nano serê şaredarîyanê ci, 80 serreyan erzeno zindan, dayîkê pîrê ke roje yê înan rê zulm keno. No munafiqîye ra  zî wet o. Erdogan sey Fîravûn û Newrûtî yo. Tena rexnekerdişê ey nêbeno. Ganî vera zulmê ey bero vejîyayene. Muslumano ke rêça Erdogan de şino ganî çimê xo abikero û na raştîye bivîno. Bitaybetî zî  Muslumanê Kurdistanî  wa bizanê ke hemverê  înan de yew zalim û munafiq esto. Bi paştdayîşê AKP’yî gune mekê. Patşdayîşê AKP’yî paştdayîşê munafiq, zalim û gunekarî yo. Ez nê Quran wina vano. Xora kam binê zanayîşê ci ê dînî esto naye zano. No problemê cimatî yo  wîjdanî û ehleqî yo. Muslumanê Kurdistanijî mecbûrê ke vera naye tewir bigê. Qetilkerdişê qijanê ma sey îbadetî vînenê. Hemverê ma de zalimêk esto ke bi Sureya Fetîhî îşxalkerdişê welatê ma bimbarek hesibneno. Şima nêeşkenê hemparê nê bê. Eke ma  wazenê Roşanî bi raştî bimbarek bikero ganî verê ci ma problemanê xo çareser bikê. Îlkeyê bingeyên ê Îslamî vera zulmî xoverdayîş o. Îbadeto tewr pîl no yo.’’