Îqtîdarê AKP-MHPyî xîret kerd ke qezayanê Riha yê serê sînorê Rojawanê Kurdîstanî de metodanê şerê taybetî bivisno dewre û wina weçînayîşan ra netîce bigêro. Rixmê ney zî îqtîdar Xelfetî de ser nêkewt, Bêrecûk de komployêko cîya kerd. Hemşaredarê Bêrecûkî Mehmet Begît weçînayîşan ra hîrê rojan dima DEM Partî ra îstîfa kerd û derbazê AKPyî bi. 

Hemsereka DEM Partî ya Riha Saîme Aîşeoglu û Namzedê Şaredarîya Riha yê DEM Partî Celalettîn Erkmenî derheqê babete de ANFyî rê qisey kerd.

Erkmenî îfade kerd ke îqtîdar nêeşkeno rayîr û metodanê verê weçînayîşî bivisno dewre cola weçînayîşan ra dima senaryoyêko newe visto dewre. Erkmenî vat: ''Dewlete zanayêne ke Bêrecûk de DEM Partî do ser bikewa coka no senaryo amade kerd. La meseleya pîle aya ke hayîya ma ney ra çin bîye. Na zî kêmasîya ma ya. Merkezê Pêroyî do komîsyonê cigêrayîşî awan bikero û tayê çîyan eşkera bikero. 

Serê xeta Bêrecûkî de planê stratejîkî est ê. Sînorê ma de Rojawanê Kurdîstanî est o, seba Dîlokî no pirdêk o. Xeta Serê Kanîyê, Akçakale, Pirsûs û Rojawanî. Coka îqtîdar nêwazeno nê qezayan bido. Ma xeylêk kayî pûç kerdî. Dima ke tayê serebûtî qewimîyayî dewlete hinî nêeşka planê xo binimna û kayêko pîl kay kerd. Rimê ney zî nêeşkaye ser bikewa.''

Saîme pare kerd ke verê het çî ganî ê rexneyanê xo bidê şarê Bêrecûkî û vat: ''Mehmet Begît serrêke û nêm bi hawayêkê fermî nêboo zî war de, mîyanê karanê partîye de bi. Rewşêka winayên a ke mîyanê ma de ameya plankerdene, birêxistinkerdiş û projeyêk bi. Weçînayîşan ra dima cade ey rîyê xo yo raştikên mojna. Pêvînayîşê ma yê bi ey ser nêkewtî. Ey bi xo senaryoyo ke verê cû amebi amadekerdene vist dewre.''