Endama Koordînasyonê KJKyî Besê Erzîncan Programê Xwebûnî yê Jîn TVyî de cewab da persanê Arjîne Baysal. Qiseykerdişê Erzîncane ra qismêk wîna yo:

“Rayber Apo roja verêne ra cinîyan rê cîya nêzdî beno. Rojhelatê Mîyanênî de cinî tim binê zextî de ya, nêeşkea nefes bigêro. Bi nameyê îslamîyetî zî cinîyan rê zaf zext ame kerdene. Cinîya kurde ya ke nasnameyê şarê ci çîn o , dilab-hîrlab raştê zextî yena. Rayber Apoyî komelê wînayênî de dest pê têkoşînê azadîye yê cinîyan kerd.  Rayraberdişê têkoşînê xelisnayîşê neteweyîyî muhîm o. Şarê kurdî hewceyê xelisnayîşê neteweyîyî bi la senî. Rayber Apoyî waşt ke vera sîstemî alternatîf rono.  Tewirê Rayber Apoyî goreyê têgêrayîşanê şorişgêranê bînan radîkal bi. Rayber Apoyî vat, ‘Şorişê ma Şorişê Cinîyan o.‘ PKKyî hema roja verêne ra têkoşînê xo pê zanayîşê azadîya cinîye da destpêkerdene. Rayber Apoyî semedê şorişî, rêxistinkerdişo xoser ê cinîyan aferna.

Tarîx de reya verêne semedê azadîya cinîyan tayînan çîyêk kerdêne. Seba ke ma bi serran o pê sîstemê camerdî bîyî pîl, sere de semedê ma no zehmet bi. Dima ra ma raştîya xo fam kerd û zincîrê koletîye xo serî ra eştî û dest pê têkoşînî kerd. Pîya bi her pratîkî ma tecrubeyî kerdî pêser û aver şîyî. Semedê Rayber Apoyî cinîyî zaf ercîyayeyî bî. Rayber Apoyî seba ke ma biresno, aver bêro zaf kede daye. Ma her yewe rê rolê gîrdî fasilnayêne û berpirsîyarî dayêne ci. Tim pê heskerdiş û hurmetî cinîyan rê bîyênî nêzdî. Tim cinîyî wasifnayêne û averberdişê înan esas girewtêne. Her çîyê ma rê eleqedar bîyêne, perwerde kerdêne. Paştîya ey cinîyan ra pêt bî. Ez zî cayê Rayber Apoyî de menda. Ez eşkera vajî ke qiymeto ke Rayberîye dano ma qet çewî ma nêdayo. Verî ez pasîf bîya la dima ra bîya kesêka jîhat û aferanayoxe. Rayraşîyayîşê ma nê bingeyî de bêmabên aver şi.

Rayber Apo tim vano ‘cinîyî ganî mi tewr hole fam bikerê û vatişanê mi bîyarî ca.’ Çunke zano ke bi hezaran serrî yo ke cinîyî azadîye wazenê û semedê nê têkoşîn kenê.  Cinîyî wazenê nê sîstemî ra qesasê hezar serran bigêrê. Coka ganî cinîyî semedê vilakerdişê felsefeya azadîye ya Rayber Apoyî zafêr têkoşîn bikerê. Ma cinîyî ganî pê paradîgmaya Rayber Apoyî xo perwerde bikerê û na paradîgma pêro merdimîye ra vila bikerê. Her kesî ra zafêr no wezîfeyê ma yo. Ma cinîyî Rayber Apoyî ra zaf hes kenê la famkerdişê ey û caardişê vatişanê ey de kêm manenê.  Rayber Apoyî ra heskerdiş, heskerdişê Kurdîstan û komelî yo. Rayber Apoyî ra heskerdiş, merdimî/e keno azad. Beno ke tayî na babete de ma rexne bikerê la heqîqet no yo. Felsefeya Rayber Apoyî semedê pêro merdimîye ya. ”