Qezayanê Gogsî, Tatos û Karaçobanî yê Erziromî de 15 endamê Meclîsê Şaredarîya HDPyî hetê Wezaratê Karanê Zereyî ra wezîfeyî ra ameyî girewtene. Dewa û cipersayîşê ke derheqê  înan de yenê rayraberdene sey sebebê xespkerdişî ameyî ramojnayene.

Gogsî de pîya bi hemşaredar Burhanettîn Şahîn, Erdal Bayram, Yakup Aras, Yuksel Kişî Abdurrehîm Goksu, Mahmut Çemenda, Alaattîn Kirtil û Emele Turan wezîfeyî ra ameyî girewtene. Hûmara endamanê meclîsî  13 ra bîye 8. Hemşaredare Melîke Goksu zî 18ê êlule 2019 de ameyebî tepiştene û herinda ci de qeyûm amebi tayînkerdene.

Tatos de Cemalettîn Şengul, Îsmet Karabulut û Alî Saît  karî ra ameyî girewtene. Hûmara endamanê meclîsî ya ke 9 bîye bi nê xespkerdişî bîye 6. Namzedê HDPyî Muzahît Karakuş vîjnayîşê adare de bi rayanê zêdan amebi vîjnayene la bi bahaneyê KHKyî mazabataya ci ameyebî xespkerdene.

Karaçoban de zî hemşaredare Remzîye Sonmez, Kazim Erhanî Murat Yaprak û Ekrem Çintimur wezîfera ameyî dûrfînayene û hûmara endamanê meclîsî 10 ra ginaye ware bîye 6.

.