Dêro tarîxkî Taşhoron (Surp Yerrortutyun) yo ke taxa Çavûşoglû ya Malatya de, ke domanîya Hrant Dînkî tîya derbaz bîye, seba ke karê restorasyonî yê serra 2012 nêmcet mendo, dêr rijîyeno. Yeno texmînkerdene ke dêr nêmeyê dîyine yê seserra 18’ine de ameyo awankerdene.

Milkê dêrî mabênê Şaredarîya Bajarê Girdî ya Malatya, Mudirîya Pêroyî ya Weqfî  û Mudirîya Pêroyî ya  Awanroşan a Mîlî de ame parekerdene. Panc serrî verê cû karê restorekerdişî dest pêkerd û îskeleyê vernîya dêrê tarîxkî hîna zî cayê xo de vindetî yê. Rîyê bê xemîye ra dêr bedilîyayo xirbe û rijîyeno

Heta serranê 1970’an xeylî keyeyê Armenîyan na herême de bîyî. Rîyê hêrişan ê demî  û derba 1980’î ra keyeyê ke mendê zî koç kerd. Çend serrî verê cû qubbeya welin a dêrî rijîyaye. Restorasyono ke panc serrî verê cû dest pêkerd, şarê Armenî û hemwelatijê taxe keyfweş kerdîbî.

Goreyê zanayîşanê ke hemwelatijanê taxe ra ameyê girewtene, seba ke pereyê fîrmaya restorasyonî nêameyê dayene, fîrma zî dest karî ra ante. Hemwelatijan vat, dêr rîyê bê xemîye rijîyeno, qubbeya ci ya weline rijîye û nê wextanê peyênan de dêr bîyo cayê kesanê ke madeyan bi kar anê. Hetê bînî ra, defînêgeran ra yeno talankerdene.