Gerîla Çekdar Amed Cîlo de dadîya xo ra bîyo, Cîlo de bîyo pîl û Cîlo de şehîd bi. Seba ci cayêko bîn çinbi. Çekdar Amed 9ê êlule de 3 embazanê xo reyde tewrê karwanê bêmergan bi. Çekoyê ciwanî vatêne 'Ha ma ameyî, no ca cayê ma yo yanî cayê koma Cîloyî yo.'

Ez seba roportajî bi israr şina cayê Çekdarî. Ci ra wazena ke wa nêşermo. Embazê ci zî seba roportajî seferber bibî. Mi kamera daye verê ci û şîya binê darêke de ronişta.  Çend deqayan ra dima Çekdar ame hetê mi û bi tirkîya amedijan vat: ''Wina têna nêbeno, xêrê xo ra bê dûştê mi de ronişe ke ez zî qisey bikera.'' Çekdarî dest pê qiseyan kerd. Qala şerê taybetî kerde ke çira yeno kerdene, medyaya Erdoganî senî şerê taybetî ana ca.

Gerîla Çekdarî dişmen şinasnayêne coka bire dabi ke xo biresno koyan û şer bikero. Herinda ê gerîlayê hîsgerî de hînî gerîlayêko hêrsîn û awirtûj estbi. Dima ke qiseyê ci qedîyayî huya. Mi va: 'La to qaşo qisey nêkerdêne.' Ey zî vat: ''Ez embazênê xo rê hîsgêr a, dişmenî rê nê.'' Ma bi saetan Cîlo, embazan û kede ser o xoşebere kerd.

Aşmêke ra dima ma gerîla Çekdar û şeş gerîlayê rindî erşawitî Cîlo. Koyan de xatirwaştiş û oxirkerdiş çîyo tewr zehmet o. Seke Alî Haydar Kaytanî vatêne: ''Cîyabîyayîş destpêko verên ê eşqî yo.'' Oxir bo to rê Çekdar Amed, Çekoyê Cîloyî.