Karasu: NATOyî ra nêbo cade bin kewena

Endamê Konseya Rayberdişî ya KCKyî Karasuyî ard ziwan ke Îngilîstan, Amerîka û NATO seba tasfîyeya PKKyî paştî danê dewleta tirke û vat: ''Destekê înan ra nêbo dewleta tirke nêeşkena şerî rê dewam bikera û cade bin kewena.''

Endamê Konseya Rayberdişî yê KCKyî Mustafa Karasuyî derheqê rojdemî de roportajêk da ajansê ma.

Beşê diyînî yê roportajî ra noqtayê girîngî wina yê:

Iraq û Başûrê Kurdîstanî de nika hukmatê ke îradeyê şarî temsîl nêkenê est ê, coka qels ê. Dewleta tirke PDK û Iraqî sey hacetê tedayan şuxilnena. PDK û Iraq Şingal û Herêmanê Pawitişî yê Medya de gamanê ke Tirkîya do pê kêfweş biba, erzenê. Xora PDK û Iraq binê tesîrê Amerîka de yê. Rewşa Iraqî rayîr dana îşxalê Tirkîya û hemkarîya PDKyî.

Amerîka, Îngilîstan û NATO seba tasfîyeya PKKyî destek danê dewleta tirke. Dewleta tirke pê îmkananê NATOyî hêrişê gerîlayan kena. Amerîka, Îngilîstan û NATO Rojhelatê Mîyanênî de ewnîyenê menfatanê xo ra. Ewro kurdî bi giranî destekê şaranê Ewropa û dinya gênê, no zî şino zorê dewleta tirke. Tirkîya wazeba serê Rojhelatê Mîyanênî ra gazî bera Ewropa û bi nê hawayî zî biba hêzêka serdeste. Xora Tirkîya do sey bedelê ney tasfîyeya kurdan biwaza. Ewropa zî do tawîz bida Tirkîya û bi nê hawayî Tirkîya hîna zaf xo rê girê bida. Ganî ma nê têkilîyanê gemarinan teqîb bikerê û teşhîr bikerê.Wa her kes bizano ke xeta winasêna ke dûştê azadîya kurdan a, do asayî nêba.

Îqtîdarê AKP-MHPyî nêwazeno kurdê Rojawanî azad bibê. Çunke goreyê ci eke rojawanijî azad bibê kurdê Vakurî zî do azadîye biwazê. Tirkîya coka pê bahaneya asayîşî tim hêrişê Rojawanî kena. La Sûrîye de bingeyê pêro krîzan de Tirkîya est a. Îqtîdarê AKP-MHPyî têna Rojawanî rê nê pêro dinya rê gefan waneno. Dewleta tirke Rojawan de qirkerdiş kena, demografî vurnena. Rûsya, Amerîka, NATO û Ewropa nê kerdişan vînenê la hêrişanê Tirkîya kenê meşrû û teşwîq kenê. Mesuldarê nê hêrişan Amerîka, Ewropa, Rûsya û NATO yê. Erdogano ke Herêmanê Pawitişî yê Medya de nêeşkeno netîceyêke bigêro, nika zî wazeno krîzê Ukrayna bişuxilnî û hêrişê Rojawanî bikero. Bi nê hawayî îqtîdarê AKP-MHPyî keno ke îqtîdarê xo mende bikero. AKP beno ke biwazo Rojawan îşxal bikero, dima zî şoro weçînayîşan. La şarê Rojawanî do vera hêrişan xo ver bido. Şerê winasênî de AKP-MHP do bin bikewo û şarî do ser bikewê.

Tirkîya nika sey bedelê endamîya NATOyî tedaya Fînlandîya û Swêdî kena ke vera têgêrayîşê kurdan tewir bigêrê. Yanî bi zelalî înan rê şantaj kena. Dewleta tirke wazena a senî verê kurdan de têgêrena Ewropa zî wina bikera. Xora Swêd zî tede welatê Ewropa waştişê dewleta tirke ser o dezgehanê kurdan rê teda kenê. Beno ke na teda bizêdîya la ê do pêro waştişanê Tirkîya nêkerê. A raşte dewleta tirke seba ke ambargoyê çekan ê vera ci bêro wedaritene hende şina nê welatan ser. Dewleta tirke bi taybetî wazena F-16î bêrê rotene ci. Aseno na babete de Ewropa do tay tawîzan bida. Xora ma dûştê NATOyî yê la reyna zî ganî qet yew hêz vera Tirkîya sere nêrono û nêbo hemkarê sûcanê Tirkîya.  

Tirkîya de krîzêko ekonomîk o pîl est o û sebebê nê krîzî zî şerê vera kurdan o. Muxalefetê Tirkîya ganî ney bîyaro ziwan, yanî sebebê krîzî yo raştikên eşkera bikero.  Ganî muxalefetê Tirkîya eşkera bikero ke heta ke meseleya kurdan nêra çareserkerdene qet yew mesele çareser nêbena. Her çî ra verî ganî demokrasî bêra caardene, nêbo krîzî do dewam bikerê.

Dewleta tirke seba ke dişmena kurdan a, dişmena PKKyî ya. Rayber Apoyî ra nêbîyêne na raştîya dişmenî hende rehet nêameyêne dîyene. Karaktero tewr girîng ê PKK û Rayber Apoyî no yo ke raştîya dişmenî hol zanenê. Îqtîdarê AKP-MHPyî tradîsyonê qirkerdişî yê dewlete ra destek gêno û kurdan qir keno. Coka muxalefet zî paştî dano nê hêrişan. Hêzê mîyanneteweyî zî hema zî sey seserra 20. paştî danê qirkerdişê kurdan. PKKyî pê têkoşînê xo verê polîtîkayanê nê hêzan girewt. Naye ra nê hêzî wazenê PKKyî çin bikerê. Hetê bînî ra nê hêzê kolonyalîstî wina fikirîyenê ke îdeolojîya Rayber Apoyî verê polîtîkayanê înan ê serê herême asteng a. Coka vera paradîgmaya Rayber Apoyî şer kenê. Nê hêzî vera Rayber Apoyî û PKKyî destek danê Tirkîya û seba ke mîyanê kurdan de îdeolojîya Rayber Apoyî aver nêşora hetê PDKyê antîdemokratîkî de ca gênê. La ne statukoyo nikayên ê Rojhelatê Mîyanênî ne rejîmê Tirkîya ne zî PDK eşkeno nê hêzan payan ser de vindarnê. Ma bedelanê giranan zî bidê, têkoşînê ma do plan û hêrişanê înan pûç bikero, Kurdîstanê Azadî û Rojhelatê Mîyanênî yê Azadî awan bikero.''