Endamê Komîteya Rayberdişî ya PKKyî Murat Karayilanî Radyoya Dengê Gelî rê qisey kerd û rojdem ercna.

Qiseykerdişê Karayilanî ra tay noqtayê girîngî wina yê:

''Komployê 9ê Teşrîna Verêne hetê hêzanê mîyanneteweyîyan ra amebi rêxistinkerdene. No hêriş şexsê Rayber Apoyî de vera şarê ma ame kerdene. Vera komployî tewr zaf Rayber Apoyî xo ver da û têkoşîn kerd. Komplogeran armanc kerd ke Îmrali de Rayber Apoyî bêtesîr bikerê. La Rayber Apo tîya de bi afernayîşê paradîgmaya xo bi hêvîya şaranê bindestan. Rayber Apo wexto ke dekewt Îmrali rayberê kurdan bi la nika o rayberêko global o.

Bêguman komplo ewro dewam keno. Heta ke sîstemê Îmraliyî est bo û Rayber Apo esîr bo komplo dewam keno. Coka ganî ma serra 27ine de seba çinkerdişê komployî bixebitê. Komplo vera îradeyê şarê ma hêrişêk bi. Sere de Amerîka, Îsraîl, Brîtanya 34 dewletan mîyanê komployî de cagirewt. Ganî nê dewletî kurdan ra uzrê xo biwazê. Rayber Apo kesêko normal nîyo. O kesêko winayên o ke verê meseleyan de wayîrê perspektîfanê çareserîye yo. Coka ganî her kes, pêro cinî û ciwanî, roşnvîrî, sîyasetmedarî, hunermendî Hemleya 'Rayber Apoyî rê Azadîye, Meseleya Kurdan rê Çareserîye' de cabigêrê.

Seba azadîya Rayber Apoyî ganî ma têkoşîn pîlêr bikerê. Nika ma dekewtî serra diyîne ya hemle.  Seba ke na hemle netîce bigêra ganî ma hîna zaf têkoşîn bikerê û Rayber Apoyî azad bikerê. Rayber Apo yew kes nîyo; o yew nasname yo û azadîya ey azadîya kurdan a. Amed de 13ê teşrîna verêne de mîtîngê azadîye est o. Seba azadîya Rayber Apoyî wa her kes tewrê nê mîtîngî bibo.

2017 de wextê Referandumê Başûrî de dewleta tirke bira îşxalê Başûrî girewtbî. Gerîlayî nê 7 serrî yo, bi taybetî 4 serrê peyênî yo vera îşxalî xo ver danê. Dewleta tirke bi çekanê modernan, bi çekanê qedexeyan, bi destekê PDK û NATOyî, bi destekê Iraqî vera ma şer kena. Dewleta tirke bi cerganê sey El Nûsra, bi qoricîyan vera ma dana şerkerdene. Rixmê ney zî artêşa îşxalkere Zap de kilîdkerde mende. Ma teyna Başûrî ney pêro Kurdîstanî pawenê. 

Nika Rojhelatê Mîyanênî de şerê giranî est ê. Nê prosesî de kurdî ganî xo rê yew stratejîya neteweyîye awan bikerê. Dişmenê kurdan zaf ê. Heyf ke PDK zî dişmenanê kurdan de têgêreno. Ganî welatperwerî vera PDKyî tewir bigêrê. Dewleta tirke PKKyî xo rê kena bahane la a raşte dişmena pêro kurdan a. Şarê ma yê Başûrî ganî bi xurtî paştî bido xoverdayîşê gerîlayan. Ma venga pêro partîyan, dezgehan, roşnvîran, hunermendan û sîyasetmedaran danê ke nê prosesê krîtîkî de hînî yewîya neteweyîye bîyarê ca. Ma şexsê şarê Behdînanî de venga pêro şarê Başûrî û parçeyanê bînan danê ke xoverdayîşê gerîlayan rê paştî bidê.

Erdogan vano 'Îsraîl do hêrişê Tirkîya bikero' la zûran keno. Erdogan terseno ke nê prosesê şerî de kurdî beno ke bibê wayîrê heqan û statuyan. Eşkera yo polîtîkaya dişmenîya kurdan do dewam bikera. La şerê vera kurdan binî ra îqtîdarê AKP-MHPyî qels kerd. Ekonomîya Tirkîya rîyê polîtîkayanê şerî ra rijîyaya. Biewnê Bahçelîyî destê endamanê Meclîsî yê DEM Partî girewto. Nê hê peyê kayê neweyî de yê.  Bi nê kayan wa çew mexapîyo. 

Îqtîdarê AKP-MHPyî bi polîtîkayanê şerê taybetî têgêreno. Ma vera polîtîkaya ajankerdişî venga qoricîyan dabi ke nê karî ra fek vera bidê. La ma ancî venga nînan danê. Dewleta tirke qasê 800 qoricîyî Vakurî ra berdê Başûrî. Wa qoricîyî tewrê operasyonanê îşxalî yê dewleta tirke nêbê. Wa Başûr de, Rojawan de nêbê hemparê îşxalî. Wa qoricîyî çekan war verdê. Pereyo ke seba gonîya ewladanê kurdan dîyeno jehr o. Qoricîyan rê vengdayîşê ma no yo.''