Almanya de hewteyê vîyarteyî de Hemserekê KCDK-E yo verên Yuksel Koç bi îdîaya ‘endamîya PKKyî’ tepişîyabi. Endama Parlamentoyê Federale yê Die Linke Cansu Ozdemîr derheqê babete de ajansê ma rê qisey kerd.

Ozdemîre îfade kerd ke verê Almanya de firsendêko tarîxî est o ke paştî bida prosesê haştîye la bi nê nêzdîbîyayîşê xo tewirê xo zî eşkera kena.

Ozdemîre dîyar kerd ke înan bi vernîyazêkî parlamento de pers kerd ke Almanya feshbîyayîş û çekverdayîşê PKKyî ser o senî tewir bigêra. Ozdemîre vat: ‘’Rêxistina ke feshkerdişê xo îlan kerdo hema zî Almanya de qedexe hesibîyeno û nê qedexeyî ser o merdimî tepişîyenê Ez naye huqûqî nêvînena.

Ma sey Partîya Çepe wazenê ke hukmatê Almanya yo newe bi pozîtîfî nêzdîyê prosesî bibo û paştî bido prosesî. Prosesêkî dest pêkerdo la prosesê haştîye de ganî wird terefî bibê wayîrê heqan. Ganî wird terefî wayîrê heqan bibê. Ganî tecrîd wedarîyo û Birêz Ocalan azad bibo ke bi aktîfî tewrê prosesî bibo.’’

Ozdemîre da zanayene ke Almanya de bi serran o komelê kurdan yeno krîmînalîzekerdene û vat: ‘’Almanya de qasê 2 mîlyonî kurdî est ê ke warê ekonomîk û kulturelî de Almanya rê hêz danê. Ganî hendê komeleyanê Tirkîya Almanya paştî bida komeleyanê kurdan. Sloganê ‘Jin, Jiyan, Azadî’ hetê Ocalanî ra ameyo awankerdene. Êyê ke nê sloganî qebul kenê ganî mîrasê Rayber Apoyî zî bişinasnê.’’