Fermandaranê YJA-STARî ra Edessa Cejneye şere binateyê PKK û dewleta tirkî ser o ajansê ma rê qisey kerde.Cejneye dîyar kerde ke şero tewr gird no dem de beno û va: "Tena Warê Pawitişî yê Medya û Vakur de nê, Başûr û Rojawanê Kurdîstanî de zî dewleta tirkî reyde şer esto û faşîzmê AKP- MHPyî vera têkoşînê gerîlayan bêçare yo.

SEBA QIRKERDIŞÊ KURDAN GERÎLA HEDEF GIRÎYENO

Cejneye qiseykerdişê xo wina domnaye: "Dewleta tirkî tengayî de ya û bi herişkarîye wazena tengayî ra bivejîyo. Coka Vakur, Başûr û Rojawan de hêrîşê xo zêdnayî.

Faşîzma AKP Û MHPyî gerîlayanê azadîya Kurdîatanî xo rê sey astengîye vîneno, wazeno ke verê na astengîye binate ra wedare û dima ra zî şarê kurdî qir bikero. Hêrişê Xakurkê, Efrîn û Şengalî na çarçewa de bîyî."

ŞEMZÎNANIJÎ QORICÎTÎYE Û AJANTÎYE RED KENÊ

Cejneye va: “Şemzînan de dewleta tirkî sey wextêk senî ke kerdêne, nika zî JÎTEM, Hîzbullah, Tîmê Xençerî, Tîmê Esedullahî û sewbîna kontrayan reyde têgerena. Bi faalîyetanê kontrayî wazena ke şarî bitersna û teslîm bigîra. Grûbanê kontrayî ke perwerdeyo taybetin dîyo, herême de bi cîya-cîya xoradayîşê kincan, têgerenê. Reyna yewîyê taybetinî dûmî nanî ro, qereqolan ra bi obus û hawanan dormeyî ser o bombeyan varnenî û destûr nêdîyeno şar şêro hêga û wareyanê xo. Bitaybetî zî cayê sivîlan yenî hedef girewtene û no zî şarê Şemzînanî ser o tengayî virazeno. La rixmê peroyê zehmetîyan zî şarê Şemzînanî bi hawayo sereberz vera polîtîkayanê şerî de vejîyeno.”

GERÎLA BI TÊKOŞÎNÊ FEDAÎTÎYE HÊRÎŞÊ DIŞMENÎ PÛÇ VEJENO

Edesse Cejneye vera operasyonanê tirkî de çalakîyê têsîrinî yê gerîlayan viste vîr û wina dewam kerde: “Gerîlayanê ma xeylê çalakîyê girdî viraştî û bi nê çalakîyan de bi desan eskerî kişîyayî. Dewlete wazena ke bi teknîkî serbikewa û no semed ra heme îmkananê xo şuxilnena. La gerîlayê azadîya Kurdîstanî bi têkoşînê fedaîtîye heme herişanê dişmenî pûç vejenî û waştişê înan qirikê ci de verdanî. No zî nîşan dano ke gerîla her wextî ra hîna jîhatêr o. Xora karê gerîlayî tena vernîya dişmenî guretiş nîyo, wezîfeyo bingeyî zorê dişmenî berdiş o.”

PKK TEVGERÊ HEYFGIREWTIŞÎ YO

Cejneye daye zanayene ke PKK partîya şehîdanî ya û wina va: ‘‘PKK heta ewro rêça şehîdan de têkoşîn dayo, bi gird û serkewt. PKK vîr û cuya şehîdan açarna çalakîyêka rêxistinin. PKK bi waştişê guretişê qesasê şehîdan heta ewro ame. Qesasê hemra Hakî Karerî ma kerd partî. Têkoşînê zîndanî yê Mazlûm, Kemal û Hayrîyan zî ma peyser açarna welatî. Qesasê Karasûngûr, Egîdan zî ma kerdî gerîla û ma bîyî arteşa gerîlayan. Qesasê Bêrîvane, Bêrîtane û Zîlanan zî şorişo tewr pîl ye tarîxî, şorişê azadîya cinîyan vet meydan. Nika zî qesasê hemrayê Agirî Mazlûm Pîrdogan, Hamza Baz Tekoşîn, Atakan Mahîr û Zekî Zengalî serra 40. ya patîye de ma kirişeno serkewtişî. PKK tevgerê heyfgirewtişî yo û qesasê şehîdanê xo geno. Wa her kes naye hol bizano, guretişê heyfî nizdî yo.