Fermandaranê HPGyî ra Rustem Botanî derheqê têkoşînê Zagrosan de ANFyî rê qisey kerd.

Qiseykerdişê Botanî ra beşêk wina yo:

''Ez verî şehîdanê Werxelê, Girê Sorî û Zendûra yad kena. Embazanê ma xo rê xoverdayîş esas kerd. No xoverdayîşê ma dewam keno. Bi taybetî vera konseptê şerî yê dewleta tirke ya faşîste, yanî vera rejîmê AKP-MHPyî 6 mengî yo têkoşînêko bêhempa, xoverdayîşêko bêhempa yenê kerdene.

Hêrişê dewleta tirke 2016 ra nata dewam kenê û vera zêdîyenê. Dewleta îşxalkere semedê tasfîyeya gerîlayan pêro îmkanê xo şuxilnayî. La nêeşkaye ser bikewa. Ne teyarayanê şerî ne gazo jehrîn ne zî çeka kîmyewîye înan rê fayde kerd. Nê 6 serran de gerîlayan zî teknîk û taktîkê xo kerdî newe.

6 mengî yo dişmen bêmabên pê teknolojîya dewrî bi taybetî pê çeka kîmyewîye hêriş kena. Dewleta tirke semedo ke bikewa tunelan pêro metodî şuxilnayî. Nê dewrî de rixmê a teknolojî dewleta tirke vera têkoşînê gerîlayan bêçare menda. Dewleta tirke pê xoverdayîşê gerîlayan nêeşkaye. Gerîlayî vera hêrişanê kîmyewîyan bêçare nêmendî û pê teknîk û taktîkanê cîyayan çalakîyê sabotajî kerdî.

Nê çalakîyanê gerîlayan netîceyê xurtî ardî. Çalakîyanê YJA-Starî rayberîya nê dewrî kerde. Wan, Gever, Botan, Metîna û Zagrosan de çalakîyê xoserî ameyî kerdene. Yanî gerîlayî têna pozîsyonê pawitişî de nêmendî. Gerîlayan  hem xo pawit hem zî xeylêk cayan de vera dişmenî çalakîyî kerdî. Xeylêk cayan de derb daye dişmenî ro, dest na çek û cebilxaneyanê înan ser. Nê pêroyî netîceyê newebîyayîşê gerîlayan ê wextê neweyî yê.

Gerîlayan Mamreşo, Girê Şehîd Serdarî û Zendûra de nêverda ke dişmen ser bikewo. Girê Sorî û Werxelê de xoverdayîşêko pîl kerd. Girê Sorî de şexsê embaz Botanî de têkoşînêko pîl ame kerdene. Dişmen neçare mend ke xo apey bianco. Xora Werxelê de 4 mengî yo xoverdayîş dewam keno. Dişmen nêeşkeno bikewo tunelan. Embazî çalakîyanê cîyayan kenê. Embazanê ma şerê tunelan de taktîkê girîngî mojnayî. Embazî tunelan de netîceyanê girîngan visnenê destî.

Xoverdayîşê gerîlayan şexsê embazan Cûmalî, Diyana, Mahîr, Botan, Diljîn û Serhat de xurt bi. Ganî ma vajê ke têna şarê kurdî nê şarê bînî zî wazenê azad bibê. Nika bala înan pêroyînan xoverdayîşê ma ser de ya. Ma pê îrade û tewirê embazanê xo sereberz ê. Ruhê embaz Şoreş Zagrosan de dewam keno û derbanê pîlan dano dişmenî ro. Gerîlayî rêçê xoverdayîşî de yê. No xoverdayîşê ma do qetî netîce bigêro. Ez reyna pêro şehîdan bi minetî yad kena û têkoşînê embazan selam kena.''