Fermandaranê Qerargehê Merkezê Pawitişê Şarî (MPŞ) ra Amed Malazgîrtî cîhazê bêtelî ra xîtabê gerîlayanê ke Avaşîn û Zap de şer kenê kerd.

Malazgîrtî derheqê serebûtanê peyênan ê cepheyê şerî de agahîyî dayî û pare kerd ke înan 23ê nîsana 2021î de vera hêrişanê hîrayan ê artêşa tirke Hemleyê Şorişgêrî yê Cengê Xabûrî û Bazanê Zagrosî dabî destpêkerdene.

Malazgîrtî vat: ''Dişmenî operasyonê 23ê nîsane de nêresa armancê xo û xeylêk derbî werdî. Têna dişmen tay cayanê Avaşînî de ca bibi. Dewleta tirke 2022 de zî amadekarîyêka pîle kerde û 14ê nîsane de bi 55 teyarayanê şerî, bi desan droneyan, bi obus, hawanan hêrişê Zap û Avaşînî kerdî, leşkerê xo ardî war. Embazan nê helan de da helîkopteran ro û nêverda ke helîkopterî leşkeran bîyarê war.

Artêşa îşxalkere Kuro Jahroyî de Şêladizê de waşt leşkeran bîyara war û baregehê Sîrê yê Şilêdizê de serkêşîya tay kontrayan de tay leşkerî ca kerdî. Naye ra di rojan o mabênê gerîlayan û îşxalkeran de şerê giranî qewimîyayî.

Artêşa tirke xîret kerd ke Koyê Reşî de zî leşkeranê xo ca bikera. Roja verêne mudaxeleyê destpêkî ra dima ê nêeşkayî leşkeran bîyarê war. 18ê nîsane de leşkerî xeta Serê Sêvê ra ver bi Koyê Reşî ameyî û Girê Rûbarî û Koyê Reşî de ca bîyî. Dewleta tirke qetî nêeşkaye leşkeran Girê Cehenemî, Girê Karkerî û Şikefta Birîndaran de ca bikera.

Artêşa tirke têna 3 reyî eşkaye tay leşkeran Şikefta Birîndaran û Girê Karkerî de ca bikera. Xeta Cîloyê Biçûkî de înan waşt hewayî ra leşkeran bîyarê wa la embazanê ma da înan ro. Coka artêşa tirke wazena Koordîne, Petrût û Cîloya Biçûkî ra, erdî ra bêra û Şamkê û Girê Şehîd Şahînî de ca biba. War de şero giran dewam keno.''

Bîlançoya di rojan: 62 îşxalkerî ameyî cezakerdene

Malazgîrtî pê hesna ke Girê Werxelê yê Avaşînî de û dormeyê dewa Werxelê de şerêko giran est o û vat: ''17ê nîsane ra heta 19ê nîsane goreyê tesbîtanê ma şer de 62 îşxalkerî ameyî cezakerdene, 2 helîkopterî ameyî derbkerdene. Xeylêk birîndarê dişmenî est ê. Nê şer û hêrişanê hewayî de 7 embazê ma şehîd bîyî.

Embazanê ma bi ruhê Apogîrî û terzê milîtanîya fedayîye ya PKKyî operasyon pêşwazî kerd. Embazî dîyar kenê ke ê do operasyonê îşxalî çin bikerê. No operasyon hema do dewam bikero. Ma zî do heta peynî xo ver bidê. Seba azadîya Kurdîstanî çi hewce yo, ma do bikerê, qesasê şehîdan bigêrê.

Dewleta tirke vera gerîlayan çekanê kîmyewîyan şuxilnena. La dinya vera ney bêveng a. Dewlete Vakurê Kurdîstanî û parçeyanê bînan ê Kurdîstanî de zî hêrişan kena, zîndanan de tepişteyan qetil kena. Dewleta tirke wazena îradeyê kurdan bişikna. Dewlete wazena bi bahaneya nê operasyonî debikewa mîyanê Başûrî û xeta Musil, Kerkûkî bigêra binê kontrolê xo.

Wezîrê Karanê Zereyî yê Tirkîya cara hewteyêke verî armancê înan eşkera kerdo. Kesê ke ney fam nêkenê ya kor ê yan zî îradeyê xo teslîm kenê. Girîng o ke şarê kurdî û dostê înan nê prosesî de wayîrê dewaya xo vejîyê. Eke ewro wayîrê îradeyê xo mevejîyê siba do erey bo. Şar û gerîlayî pîya do xoverdayîşêkê pîlî bimojnê û qetî hêrişê faşîzmê AKP-MHPyî bişiknê.''