Endamê Meclîsê Partîye yê HDPyî Ozgur Zeydanogluyî çeteyê fuhuşî yê Colemêrgî vist vîrî û vat: ''Ganî heto polîtîk ê na babete bêro dîyene, ganî bizanîyo ke fuhuş sey metodêkê şerê taybetî şuxilîyeno.''
Eşkera bi ke Colemêrg û Şirnex de 'çeteyê fuhuşî' esto ke tede xeylêk qoricîyî, çawişê pisporî û tay sivîlî ca gênê. No çete hewteyî verî dima ke çawişêkê pisporî îtîraf kerd û dîmenî eşkera bîyî vejîya werte. Derheqê tehqîqatê dozgerîye yê serê çeteyî de bira 'nimite' ameye dayene.
Serekê Şubeyê Wanî yê ÎHDyî Mehmet Karataşî û Endamê Meclîsê Partîye yê HDPyî Ozgur Zeydanogluyî bale ante girîngîya heqê cuye ya mexdûran ser.
Çeteyê fuhuşî Colemêrg û Şirnex de pê gef û şantajî xeylêk cinîyan rê fuhuş ferz kerd. Netîceya kerdişanê nê çeteyî de cinîyêke kişîyaye, cinîyêke xo kişt û cinîyêka bîne zî bi hawayêkê şikdarî merde.
Rojnameyê Yeni Ozgur Politika 29ê teşrîna verêne de bi manşetê 'Çeteyê Fuhuşî' başe antbî mesele ser: ( https://www.ozgurpolitika.com/haberi-asker-polis-korucu-fuhus-ucgeni-155650 )
Goreyê xebere çekdaranê dewlete Fettah Demîr, Mesût Olmez, Hakan Olmezî keyeyê xo de pê dafikan cinîyî xapînayî û dîmenê înan girewtî. Serebût hetê çawişêkê pisporî ra ame kifşkerdene. Çawişê pisporî name, fotograg û dîmenî pare kerdî û waşt babete şora destê mehkeme. Labelê mehkemeya tirkan dewa anêkerde.
Rojnameyê Yeni Ozgur Politika zî bale ante ser ke no kerdiş vera kurdan sey şerêkê taybetî yeno caardene.
Serekê Şubeyê Wanî yê Komeleya Heqanê Merdiman (ÎHD) Mehmet Karataşî û Endamê Meclîsê Partîye yê HDPyî Ozgur Zeydanogluyî derheqê babete de ANFyî rê qisey kerd. Karataşî îfade kerd ken ganî tehqîqat bi hîsgerî û baldarî bêro kerdene nêbo cuya mexdûran do binê tehlukeyî de biba.
Karataşî vat: ''Ganî dezgehê sivîlî têkoşînê na mesele de têna nêrê verdayene. Semedê pawitişê mexdûran bira nimite şert a la wa bizanîyo ke bira nimite semedê pawitişê vergumanan dîyaya.''
Endamê Meclîsê Partîye yê HDPyî Ozgur Zeydanogluyî vat: ''Ganî heto polîtîk ê na babete bêro dîyene, ganî bizanîyo ke fuhuş sey metodêkê şerê taybetî şuxilîyeno. Hêzê serdestî semedo ke îradeyê şarî bişiknê dest erzenê nê metodan. Derheqê serebûtê Colemêrgî de zaf agahîye çin a, serebût bi temamî nêzanîyeno. Serebûtê winasênî hema zaf do eşkera bibê.''
