Dima ke Hemşaredarê Qersî Ayhan Bîlgen çarçewa 'Tehqîqatê Kobanê' de ame tepiştene herinda ci de Walîyê Qersî Turker Oksuz sey qeyûm ame tayînkerdene. Oksuzo ke bi artêşa pawitox û polîsan derbazê şaredarîye bi, kar û gereyê xo yê esilî ra verî verê şaredarîye de nimajê îneyî kerd.

Endamanê Kongreya Îslamê Demokratîkî Mala Emîn Kiliç û Hecî Qedehî derheqê babate û polîtîkayanê AKP-MHPyî de ANFyî rê qisey kerd.

Mele Emîn Kiliçî pare kerd ke îqtîdar dîn sey çekêke xebitneno û vat: ''Destpêkê tarîxî ra nata îqtîdarî dîn seba menfaatanê xo xebitnenê. Tewr peyên Saddam Huseynî vera kurdan 'Enfal' kerd. Enfal nameyê ayetêkê Quranî yo. Manaya ci zî 'xenîmet o'. Bi nê hawayî mesaj dîya ke kurdî misilman nîyê û ganî bêrê qirkerdene. Dewleta tirke zî bi ayetanê 'Fetîhî' kurdî qir kerdî. Kurdan bi îradeyê xo şaredarê xo weçînayî la îqtîdarî herinda înan de qeyûmî erşawitî. Qeyûm bêexlaqî ya. Sîstemê qeyûmî qet yew dîn, bawerî, huqûq û edaletî de ca nêgêno. Dînê fîrazî de tesdîqnêkerdişê îradeyê şarî şerê vera Homayî yo. Ewro Kurdîstan de hetê AKP-MHPyî ra vera Homayî şer dîya destpêkerdene. Qers de îradeyê şarî ame xespkerdene û seke welatêkê îşxalkerdeyî de nimajê fetîhî kenê. Dîn de cayê naye çin o. Eza venga pêro kurdan û misilmanan dana ke vera kerdişanê îqtîdarî bêveng nêmanê. Zulm ça ra yeno wa bêro; ma rê ferz o ke ma vera ci vinderê. Vera zulmî têkoşîn ferz o.''

Mele Hecî Qedehî zî bale ante nimajê Şaredarîya Qersî ser û vat: ''O nimaj batal o. Çunke tede edalet, têduştîye çin ê la zulm û îqtîdar estê. Homa holîye emir keno û vano xirabîye ra dûrî vinderê. Kesanê ke roja îneyî o nimaj kerd, seba ke zulm û heqaretî bîyarê ca, dizdîye bikerê, îradeyê şarî binpay bikerê nimaj kerd.Homa nê nimajî qebul nêkeno. No nimajê zulm û zorbazî yo. Ganî misilmanê raştikênî û dîndarî hetê îqtîdarî de ca megêrê. Êyê ke hetê înan de ca gênê seke Fîravun, Muavîye û Ebu Sufyan ê. Ewro nê bi nameyê 'homayî' ma xapînenê. Wextê îşxalê erdê Rojawanî de malayanê dewlete camîyan ra sureya Ferhî wende. La 'sureya fethî' fethkerdişê qelban ra behs kena. Yew eleqeyê îqtîdar û dînî pîya çin o. Çîyê ke ê bi nameyê Îslamî kenê, vera Quranî yê.''