Wan de sînorê Rojhelatê Kurdîstanî de serranê peyênan de trajedîya mutecîyan bena zêdêr. Serra peyêne de 50 multecîyî cemidîyayî û merdî. Multecî û koçberê ke Rojhelatê Mîyanênî û Asya ra krîzan ra bi hêvîya cuyêka başêre kewenî rayîrî felaketî yenê sereyê înan. Înan ra bi seyan multecîyî wexto ke xîret kenê ke sînorê Wanî ra derbaz bikerê mirenê.

Qezaya Ebexî ya Wanî de ke germîye kewena binê sifirî sey cayê derbazbîyayîşî yê multecîyan yena naskerdene. Ebex de her metrekare de qereqolî, kelakolî û kuleyê çimdarîye estê. La semedo ke dewlete vera bazirganîye merdiman tebdîran nêgêna her roje trajedîyêka multecîyan yena ciwîyayeyene.

Multecîyê ke sînor de cemidîyayî hema nêameyî dîyene

Tewr peyêne 9ê sibata 2020î de dewa Sariçîmenî ya qezaya Ebexî de 10 afganî û 3 kurdî yê ke xîret kerdêne sînorî ra derbaz bikerê cemîdîyayî. Serebûtî ra mengêke derbaz bîye la cenazayê multecîyan nêameyî dîyene. Selahîyetdaranê dewlete zî seba dîyîşê multecîyan heta nika karêk nêkerd. Multecîyî zimistan de otogar û parkanê Wanî de manenê.

'Verê çimanê dewlete de mirenê'

Hemwelatîyêkê Ebexî îfade kerd ke bazirganê merdiman yenê mabênê Ebexî û Îranî de bêters karê xo kenê. Hemwelato ke nameyê xo eşkera nêkerd ard ziwan ke bazirganan înan rê vat ke binê vewre de meyîtê bi desan multecîyan estê.

Hemwelatîyî wina dewam kerd: ''Kesê ke sînor de mirenê verê çimanê dewlete de mirenê. Dewlete zî her kes zî bazirgananê merdiman şinasnenê zanenê. La reyna zî nê kesî bi hawayêkê rehetî karê zo kenê. Bazirganê merdiman multeîyan ra pereyan gênê û dima înan zimistan de mîyanê mergî de verdenê.''

Serra 2019î de tewr tay 37 multecîyî cemidîyayîşî ra merdî

Goreyê avûkatanê heqanê merdiman Wan de serra 2019î de tewr tay 37 multecîyî cemidîyayîşî ra merdî. Temmuza 2019î de zî wesayîtê multecîyan qelibîyabi û 17 multecîyî merdî û 50 multecîyî birîndar bibî. 9ê sibate de zî nêzdîyê gola Wanî de 30 multecîyî ameybî dîyene ke hêle mendbî ke cemidîyayîşî ra bimirê.