Gerîlayê HPG’yî: Ma bi ruhê Şêladizê vera îşxalkaran xover danê

Dewleta Tirkî semedê îşxalkardişê Başûrê Kurdistanî wazena ke Xakurkê îşxal bikero û Bradost veng bikero. Gerîlayanê HPG’yî ard ziwan ke ê bi ruhê Şêladizê vera îşxalkaran xover danê.

Mabênê dewleta Tirkî ya ke wazena Başûrê Kurdistanî îşxal bikero û gerîlayanê HPG’yî de pêkewitşî dewam kenê. Gerîlayan derheqê xoverdayîşê xo yê vera îşxalkaran de ANF’yî rê qisey kerd.

Dewleta Tirkî Hêrişê Heme Kurdan Kena

Gerîlayan ra Dersim Sakîne yo ke Başûrê Kurdistanî ra tewrê gerîlayî bîyo waşt ke şarê Kurdî vera dişmenî hîşar bo û va: ‘’Ganî şarê ma hêrişê dişmenî hol fam bikero.  Dewleta Tirkî semedê qedînayîşê Têgêrayîşê Azadîye vera Başûrê Kurdistanî şer da destpêkerdene. Waştişê înan çînkerdişê Kurdan o.  Şarê ma ganî raştîya îşxalkaran hol vînê û vera înan bivejîyo. Nê hêrişî teyna vera PKK’yî nênê viraştene. Hêrişê heme Kurdan kenê. Seba ke Kurdan herra înan de bikerê macîr her roje şarê ma ser o bombayan varnênê.

Ganî Şarê Ma Vera Îşxalkaran Sere Wedaro

Nêtîceyê hêrişê dewleta Tirkî de qij, cinî, kal, pîr şarê Kurdî yeno qetilkerdene. Şarê herêmê qetil kenê û vanê ma  cayê PKK’yî bombardûman kerdî. Dewleta Tirkî bi nê polîtîkayan xo bi xo xapînena. Binê nameyê PKK’yî de hêrişê şarî kenê. La wa şarê Kurdî  naye zaf hol bizano. Ma semedê şarê Kurdistanî û herra ci şer kenê. Şarê ma yê Başûrî ganî bi ruhê Şêladizê sere wedaro, hurzo lingan ser. Ganî şar û gerîlayî yewbînan temam bikerê. Ciwanê Kurdan zî ganî vera nê hêrişan verê xo bidê koyanê Kurdistanî û herra xo bipawê.’’

Kurdî Estî û Do Her Tim Bibê

Gerîla Helo Helmetî zî bale atne ke hêrişê dewleta Tirkî yê Başûrê Kurdistanî her roje zêde beno û  nê vatî: ’’Ganî her ciwanê Kurdî vera îşxalî semedê pawitişê welatê xo tê bigêro. Dişmen bi bihaneyê qedînayîşê PKK’yî  wazeno ke herra Başûrê Kurdistanî îşxal bikero. Ciwanî Kurdî ganî vera naye cewab bê. Îşxalkarî ganî fam bikerê ke Kurdî estî û do her tim bibê. Bi bombakerdişî wazenê herr û xozaya Kurdistanî talan bikerê. Ma sey gerîlayî heta peynî do herre û şarê xo bipawê.’’