Herêma Serhadî ya ke  bi serewedartişanê xo yena zanayene de dewleta Tirkî gerîlayan ra derbeyanê girdan wena. 1’ê Hezîrane de qezaya Aralikî ya Idîrî de çarçeweya Hemleya Serkewtişî ya Şorişgêre de hetê HPG, YJA Star û HBDH’yî ra vera artêşa Tirkî de sey operasyonê şorişgêrî çalakîya hempare ameye viraştene. Heman roje de çalakîya sabotajî yê gerîlayan ê Bazîdî de 6 kontrayî ameyî kiştene. 31’ê Gulane de zî çalakîya vera Qereqolê Gulîzerkî yê Tendurekî de payeberzêk ame kiştene. Derheqê nê çalakîyê ke hekîmîyetê gerîlan ê herêma Serhadî ramojnenê de ma  gerîlayanê HPG û YJA Starî de qisey kerd.

Semedê Dewrê Neweyî Destpêkerdişêko Rind o

Mazlûm Rojhilat: Embazî Serhad de bi stîlê holî  çalakîyanê bitesîrî virazenê. Nê çalakîyî zaf serkewteyî yê. Embazan cuwa ver zî Serhad de çalakîyê winayên viraştîbî la na rey cayê çalakîye zehmet o. Îdir hîna cayêko birîsk o. Wesayîto zirxin yeno îmhakerdene û dima zî wesayîtê bînê ke semedê mudaxalekerdişî yene ê zî derbeyan wenê. Na çalakîye hem semedê hemleya serkewtişî ya şorişgêre ya dewrê neweyî hem zî hetê taktîkê eskerî ra çalakîya serkewteye ya. Embazanê ke na çalakîye viraşte ez înan silam kena. Ma na çalakîye ra zaf moral girewt.

Stîl û Taktîkê Neweyî Danê Qezenckerdene

Diljîn Faraşîne: Nê demê mucadeleyî de ge xoverdayîşê dayîkan ge-ge zî çalakîyê serkewteyî yê gerîlayan bale ancenê xo ser. Çalakîya îdirî sey dewamê serkewtişê grevê vêşanîye bî û ramote ke eke gerîla û şar pîya mucadele bikerê senî resenê serkewtişî. Ma reyna dî ke bi bawerîye û îradeyê xurtî gerîla eşkeno rixmê heme şertanê zehmetan çalakîye virazo. Çalakîya Îdirî ke hêrişê dişmenî pûç vetî ramote ke stîl û taktîkê neweyî danê qezenckerdene.

Vîndîbîyayeyê Dişmenî Zaf ê

Kendal Baz: Serhad de çend serrî yo rixmê şertanê çetinan ê serrewextî çalakîyê bitesîrî yenê viraştene. Taktîkêko serkewte û afernayox  yeno şuxulnayene. Ma eşkenê vajê ke gerîla herêma Serhadî de vera Artêşa Tirkî operasyon virazeno. Vîndîbîyayeyê dişmenî zaf ê.