Fermandaranê Qerargehê Merkezî yê HPGyî ra Hakî Armancî Radyoyê Dengê Gelî rê qisey kerd û rewşa Vakurê Kurdîstanî, hêrişê dewleta tirke û têkoşînê gerîlayan ercnayî.

Qiseykerdişê Hakî Armancî ra qismêk wina yo:

''Herêmanê Pawitişî yê Medya de şerêko pîl qewimîyeno. Gerîlayî uca de hê vera faşîzmê dewleta tirke têkoîn kenê. Têkoşînê Herêmanê Pawitişî yê Medya parçeyêkê têkoşînê pêroyî yo. Dişmen armanc keno ke pêro Başûrî îşxal bikero. La wisarî ra dima Metîna de, Herêma Şehîd Delîlî û Xakurkê de dişmen raştê têkoşînêkê xurtêrî ame. Wextê peyênî zî Heftanînî ra heta Zap, Xakurkê, Metîna ûsn. derbê giranî dîyenê dewleta tirke ya îşxalkere ro. Dewleta tirke binkewtişê xo nimnena û bi rayîrê medyaya şerê taybetî raştîyan çewt kena. No metodê dewleta tirke yo. La têkoşînê gerîlayanê ma her ke şino beno pîlêr. Gerîlayî hinî pisporê şerî yê. Dewleta tirke bi destekê Iraqî û PDKyî lena ke hêrişanê hemparan bikera. La gerîlayanê ma tedbîrî girewtî. 

Wextê peyênî de embazê ma Hebûn û Botan Amed de şehîd bîyî. Nê embazê ma tim bi qerardarî û îradeyî mîyanê têkoşînî de têgêrayî û tim bîyî perwerê Rayber Apoyî. Embazê ma Alan Milazgîr Herêmanê Pawitişî yê Medya de şehîd bi. Embaz Alanî qasê 30 serran têkoşîn kerd, bi taybetî Dêrsim de fermandarîyêka xurte kerde û heta nefesê peyênî xo ver da. Embz Berware Dêrsim Gilîdax de şehîd bîye. Aye zî bi serran Dêrsim de erk kerd, mîyanê Hêzanê Taybetan de cagirewt û Fermandara Eyaletê Serhedî ya YJA-Starî bîye. Embaz Serhat Patnos zî Botan de şehîd bi. Ey tim waştêne ke sey Zîlane çalakîya fedayîye bikero. Ey çend serran serkêşîya embazanê ma kerde. Şêxmû Milazgir Serhed de şehîd bi. Embaze Bêrîtane Nûrhak Kerboran de şehîd bîye. Embazê ma Herekol Gever û Axîne Gabar zî şehîd bîyî. Nê pêro şehîdanê ma peyê xo de mîrasêko pîl verda. Ez nînan bi rêzî yad kena. Ma soz danê ke tim perwerê şehîdanê xo bibê.

Temamîya eyaletanê Vakurê Kurdîstanî de bêmabên operasyonî yenê kerdene. Tewr peyên Amed, Botan, Besta, Kato, Herekol de opersyonî dîyayî destpêkerdene û dewam kenê. Dêrsimî ra heta Amedî, Mêrdînî, Garzan û Serhedî operasyonî est ê. Dişmen gerîlayanê Vakurê Kurdîstanî ra terseno. Çunke derbanê giranan weno. Dişmen zaneno ke kişteyê ci zaf ê coka qetî qalê gerîlayan nêkeno. Dişmen seke gerîlayî qetî çalakîye nêkenê mojneno. La hinî çew pê zûranê dewlete nêxapîyeno. Madem gerîlayî çin ê o çax çira Vakur de hendê operasyonî est ê? Rixmê teknîk, îmkanan û destekê xayînan zî dişmen pê gerîlayanê Vakurî nêeşkeno. Dişmen keno ke bi ajan û xayînan gerîlayan şehîd bikero. La ma do nê xayîn û ajanan ra zî hesab bipersê. Gerîlayê Vakurî teyna xo nêpawenê, vera dişmenî çalakîyanê bitesîran zî kenê. Ma pê bawer ê ke gerîlayê Vakurî do ser bikewê.''