Rêxistina HDPyî ya Amedî derheqê Rayberê Şarê Kurdî Abdullah Ocalanî de  eşkerayîyêka çapemenîye daye. Kombîyayîşî Salona Konferansî yê Vedat Aydinî de ame kerdene û wekîlê HDPyî Semra Guzel, Musa Farisogullari û Dersime Dag, hemserekê HDPyî yê Amedî Zeyyat Ceylan û Hulya Alokmen Uyanik, hemşaredarî û endamê meclîsê şaredarîyan zî tewrê kombîyayîşî bîyî.

Wekîle Semra Guzel bale ante têkoşînê vera tecrîdî ser û vist vîrî ke çalakîyê grevê vêşanîye yê ke bi rayberîya Leyla Guven ameyî kerdene tecrîd şikna. Guzele ard ziwan ke bi şiktişê tecrîdî hêvîya haştîye û çareserîye newe ra ameye destvistene la hukmatî bi polîtîkayanê şerî cewab da waştişê haştîye yê Ocalanî.

Guzele vat:''Tecrîd dewam keno. No metodê îşkenceyî yo û bêhuqûqî yo. Heta ke tecrîd biqedo têkoşînê ma do dewam biko. Birêz Ocalanî bi tesbît û tewirê xo têna seba şarê kurdî ney seba şaranê Rojhelatê Mîyanênî zî perspektîfê çareserîye nîşan da û her tima na pawite. No perspektîf xizmetê haştîye keno. No tecrîd têna vera Ocalanî ney vera şarê kurdî, cinîyan, kulturî û komelî yo. Bêvengkerdişê Ocalanî yeno manayanê xorinkerdişê nêçareserîye, şerî, bêtêdûştîye û faşîzmêkê giranî. Eke Ocalan qisey bikero haştîye do bêra awankerdene. Eke tecrîd dewam bikero şer do bibo pîlêr."

Guzele îfade kerd ke êyê ke vera Ocalanî polîtîkaya tecrîdî xebitnenê wayîrê zîhnîyetêkê faşîstî yê û tecrîd hem goreyê huqûqê neteweyî hem zî goreyê huqûqê mîyanneteweyî suc o. Eşkerayîye de ame waştene ke tecrîd binî ra bêro wedaritene.