Rêxistina HDPyî ya Amedî Yenîşehîrê Amedî de kombîyayîşêkê çapemenîye serûber kerd. Hemserekê HDPyî yê Amedî Zeyyat Ceylan û Hulya Alokmen Uyanik û îdarekarê HDPyî tewrê kombîyayîşî bîyî.

Ceylanî kombîyayîş de qisey kerd û kesê ke erdlerzê Xarpêtî de, qezayê teyaraya Îstanbulî de û felaketê vewrêsî yê Wanî de merdî yad kerdî.

Ceylanî eşkera kerd ke hêrişê îqtîdarî yê vera kurdan nêqedîyenê û îqtîdar kaosî ra ber çîyêk nêdano kurdan. Ceylanî xespkerdişê şaredarîyanê kurdan vist vîrî û vat: ''zîhnîyetê qeyûmî înkarê kurdan o. Ma nê zîhnîyetî qebul nêkenê. HDP vera nê polîtîkaya înkarî do demokrasî û haştîye xo rê sey esas bigêro.''

Ceylanî ard ziwan ke 23ê sibate de HDP do kongreya xo ya pîle bikero û vat: ''Şima bi hezaran kesan bitepişê zî ma do sîyasetê haştîye û azadîye de israr bikerê. HDP hêvîya çareserîya mesela kurdan, haştîye yo.''

Îdareyo  herêmî çin o!

Hemsereke Hulya Alokmen Uyanik zî kombîyayîş de qisey kerd û vat: ''Amed de îdareyo herêmî çin o. Waştişê şarî nêreseno îdare. Pêro şaristan binê teda de yo.''

Uyanike venga şarî da ke 10ê sibate de tewrê mehkemeya Hemşaredarê tepişteyî yê Amedî Adnan Selçuk Mizrakliyî bibo.