Rêxistina Partîya Demokratîke ya Şaran (HDP) ya Çewlîgî verê kogreya 23ê sibeta kombîyayîşê şarî viraşt. Parlamenterê HDPyî yê Çewlîgî Erdal Aydemîr, edanê Dîwanê KCDyî Hîlmî Aydogdu, serekê Komîsyonê Bawerî yê HDPyî Nîmettulah Erdogmuş, endamê Heyetê Rayberdişî yê Merkezê HDPyî Omer Onen û hemserekê Partîye yê Bajarî Veysî  Kaya û xeylêk kesî tewrê ci bîyî.

Hîlmî Aydogdu yo ke kombîyayîş de rojdem ercna bale ante rewşa Tirkîya ser û vat: ''Hetêk ra ekonomî ameya nuqtaya îflasî, neçarî, bêkarî esta, hetê bînî cumbîyayîşê ehlaqî. Nê pêroyî netîceya polîtîkaya xelete ra yenê ciwîyayene. Demo wînayên de kongraya HDPyî yena viraştene. Waştişê ma oyo ke ma pawitişê şarê xo rê cewab bê. HDP tim goreyê waştişê şarî tê gêreno do ewra ra tepîya zî kêmayîyanê xo bivîno û rixmê heme hêrişan seba şarê xo xizmet bikero.''

Nimettulah Erdogmuş zî nê vatî: ''Tirkîya her hetî peyser şina. Eke yew komel de her hetî ra peyserşîyayîş esto ûca tehlukeyê kaos û krîzî esto. Darba komelî ya seserre ya giran esta û 40 serrî yo gonî ci ra yena. Seba ke na darba ke gonîyena bêro dermankerdene prosesêk dest pêkerd. Ma hemeyan naye ra bawer kerdbi. Ma vatênê badê pêrodayîşî serrewextê haştîye yeno.  Ma va qey roje akeweno û tarî bêno roşt la ma pêro xeletîyayî, komel xeletîya. Ma fam kerd ke semedê haştîyeyêka tarîxîye, bimbareke û demokratîke ganî hema kede bêro dayene.

HDP qale û pratîk de yew o. Çike vano ey keno. Partîya ma heme îtîqatan û şaran rê bêrêk akerd. HDP semedê azadîya bawerî gamanê zixman erzeno la îqtîdar bi dîn û îmanî şarî xapîneno. Eke ey raşta senî ke vanê wina yê, wa pratîk de rmaojnê. Dîn vano dişmenîye, zulmî caverdê û semedê haştîye û way-biratîye tê bigêrê. Wa ê samîmîyetê xo ramojnê, ma zî înan rê bawer bikerê.''

Qiseykerdoxanê bînan zî bale ante zulm û zextê hukmatî ser û vat HDP rixmê heme herîşan verê îqtîdarî de çok nêdano, çend şino hîna bihez  û bi gamanê pêtan aver şino. Qiseykerdişan de ame waştene ke wa şar her wextî ra zafêr wayîrê partîya xo bivejî yo ame vatene ke xoverdayîşî şaran do ser bikewo.